Автотээврийн үндэсний төвийн Тээврийн хэрэгслийн бүртгэлийн газар “АСА" цирк буюу "Рояал Плаза" ХХК-ийн байранд толгой хорогдоод нэлээдгүй хугацаа өнгөрч буй.

Тэгвэл үүнийхээ шан гэлтэй тус үндэсний хэмээх тодотголтой төрийн байгууллага нь нийслэлийн бүх дүүргүүдийн тээврийн хэрэгслийн шилжилт хөдөлгөөний “Нэг цэгийн үйлчилгээ”-г “Үндэсний хөрөнгө оруулалтын банк”-тай хамтран гүйцэтгэж байна.

“Үндэсний хөрөнгө оруулалтын банк” нь гадаадын хөрөнгө оруулалттай хувь нийлүүлсэн, хязгаарлагдмал хариуцлагатай компанийн банк бөгөөд тус банкны 67.44 хувийг Д.Дагвадорж аварга эзэмшидэг юм. Мөн тэрбээр “Рояал Плаза ХХК-ийн ТУЗ-ийн дарга, “АСА Трэвэл” ХХК-ийн гүйцэтгэх захирал билээ.

Ингэхээр Авто тээврийн үндэсний төв "Аса" циркт барьцаалагдан Д.Дагвадорж аваргын банк болох “Үндэсний хөрөнгө оруулалтын банк”-ыг дэмжин үйл ажиллагаагаа явуулж байна уу гэх хардлага төрж байгаа юм. Автотээврийн үндэсний төвийн харьяа газруудаар өдөрт хэдэн зуун, мянган жолооч үйлчлүүлдэг.

Авто тээврийн үндэсний төв "Аса" циркт барьцаалагдан Д.Дагвадорж аваргын банк болох “Үндэсний хөрөнгө оруулалтын банк”-ыг дэмжин үйл ажиллагаагаа явуулж байна уу гэх хардлага төрж байгаа юм.

Тухайлбал, Тээврийн хэрэгслийн бүртгэлийн газар өнгөрсөн онд тээврийн хэрэгслийн бүртгэлийн үйл ажиллагааг явуулдаг “Зам тээврийн хяналт бүртгэлийн газар” татан буугдаж тус төвийн тээврийн хэрэгслийн газартай нэгдэн Авто тээврийн үндэсний төвийн Тээврийн хэрэгслийн бүртгэлийн газрыг байгуулсан. 

Тээврийн хэрэгслийн бүртгэлийн газар нь Шилжилт хөдөлгөөн, импортын бүртгэлийн хэлтэс, Бүртгэлийн архив лавлагааны тасаг гэсэн нэгжтэй. Шилжилт хөдөлгөөн, импортын бүртгэлийн хэлтэс нь авто тээврийн хэрэгслийг шинээр бүртгэж, улсын дугаар, гэрчилгээ олгох, шилжилт, хөдөлгөөнийг бүртгэх, улсын дугаар, гэрчилгээг нөхөн олгох, шинэчлэн солих, улсын бүртгэлээс хасах болон явуулын дугаар олгодог аж.

Тухайн газар энэ оны 2 дугаар сарын 17-ны өдрийн байдлаар улсын хэмжээнд 5278 тээврийн хэрэгсэлд шинээр гэрчилгээ олгож, 27746 тээврийн хэрэгслийн шилжилт хөдөлгөөнийг бүртгэжээ. Шинээр гэрчилгээ авах жолооч нар 5100 төгрөг, харин шилжилт хөдөлгөөн хийлгэхэд 7300 төгрөг тушаадаг байна. Үүний 100 болон 300 төгрөгийг Үндэсний хөрөнгө оруулалтын банк үйлчилгээ үзүүлсний шимтгэл болгон авдаг болохыг эх сурвалж мэдээлсэн.

Ингэхээр тэдгээрийн хураамж, төлбөр зөвхөн “Үндэсний хөрөнгө оруулалтын банк”-ны цэвэр орлого болж үлдсэн мөнгө нь тус банкаар дамжиж байгаа юм.

Гэтэл тус банкныхан төрийн үйлчилгээг төрийн байгууллагатай хамтран үзүүлж буйгаа умартан, тус газарт ноёрхолоо тогтоогоод амжсан гэдгийг иргэд өгүүлдэг. Ачаалал ихтэй гэгддэг Сүхбаатар дүүргийн гуравдугаар хороо АСА циркт байрладаг Тээврийн хэрэгслийн бүртгэлийн газарт үйл ажиллагаагаа явуулдаг “Үндэсний хөрөнгө оруулалтын банк”-ны ажилчдын харилцаа туйлын зохимжгүй, иргэдийг дорд үзсэн байдлаар ханддаг талаар бид өмнө нь мэдээлж байсан. Энэ байдал өдгөө ч хэвээрээ гэдгийг жолооч нар хэлсээр байгаа юм.

Ийнхүү төрийн үйлчилгээг нэг банкинд давуу эрх олгон, явуулж байгааг гайхах хүн олон байгаа гэдгийг ч энд дурдах нь зүйтэй болов уу.

Угтаа бол төрийн байгууллага төрийн 100 хувийн банк болох Төрийн банкаар дамжуулан үйл ажиллагаагаа явуулдаг бол ямар нэгэн асуудал үүсэхгүй төдийгүй, төрийн үйлчилгээ төрийнх байх ёстой гэдэг бичигдээгүй зарчим ч үйлчлэх байлтай.

“Үндэсний хөрөнгө оруулалтын банк” нь 2006 онд гадаадын хөрөнгө оруулалттай хувь нийлүүлсэн, хязгаарлагдмал хариуцлагатай компани болж Монгол улсын банк санхүүгийн зах зээл дээр анхны хөрөнгө оруулалтын банкаар үүсгэн байгуулагдсан байна.

Тус банкны ТУЗ-ын гишүүдэд Долгорсүрэн овогтой Дагвадорж, Долгорсүрэн овогтой Сумъяабазар, Банзрагч овогтой Баярсайхан нарын хүмүүс байдаг аж. Д.Дагвадорж нь Үндэсний Хөрөнгө Оруулалтын Банкны хувьцаа эзэмшигч бөгөөд сүмогийн 68 дахь их аварга, ёкозүна цол авсан анхны Монгол хүн юм. Тэрээр Рояал Плаза ХХК-ийн ТУЗ-ийн дарга, АСА Трэвэл ХХК-ийн гүйцэтгэх захирал, Монголын чөлөөт бөхийн холбооны ерөнхийлөгч болон Монголын Үндэсний Худалдаа Аж Үйлдвэрийн танхимын гишүүнээр тус тус сонгогдон ажиллаж байна.

 
Харин Д.Сумъяабазар нь Үндэсний Хөрөнгө Оруулалтын Банкны хувьцаа эзэмшигч бөгөөд 2006-2013 онуудад тус банкны Төлөөлөн удирдах зөвлөлийн даргаар ажиллаж байсан. Тэрээр 2011 оноос Монголын Спортын Барилга Байгууламжийн Холбооны ерөнхийлөгч, 2013 оноос Монгол Улсын УИХ-ын гишүүн, 2014 оноос МАН-ын Улаанбаатар хот хариуцсан нарийн бичгийн дарга, Монголын Хөдөө Аж Ахуй Хоршоологчдын Үндэсний Холбооны ерөнхийлөгч зэрэг албыг тус тус хашиж байгаа бол Б.Баярсайхан нь Үндэсний Хөрөнгө Оруулалтын Банкны хувьцаа эзэмшигч бөгөөд 2008-2009 онуудад тус банкны хөрөнгө оруулалтын банк хариуцсан дэд захирал, 2009-2013 онуудад гүйцэтгэх захирлаар тус тус ажиллаж байсан. Тэрээр 2013 оноос тус банкны Төлөөлөн Удирдах Зөвлөлийн даргаар томилогдон ажиллаж байна.

Ингэхээр хувийн хэвшлийн банк төрийн үйлчилгээг авч чадсан нь ямар нэгэн эрх ашиг, сонирхолыг зөрчил байгааг үгүйсгэхгүй юм. Ямартай ч анхаарал татаж, хардлага төрүүлэх энэ асуудалд холбогдох албаны хүмүүс анхаарал хандуулаасай гэх үүднээс энэхүү материалыг бэлтгэн хүргэлээ. 

24tsag.mn      Б.Энхжин