УИХ-ын гишүүн Х.Баттулгын туслах Л.Түвшинжаргалыг цагдан хорих эсэхийг шийдэх шүүх хурал өнөөдөр 10:00 цагт Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд болох гэж байна.

Энэхүү шүүх хуралд оролцохоор одоогоор УИХ-ын гишүүн Х.Баттулга, түүний өмгөөлөгч Д.Пүрэвбаатар нар болон Л.Түвшинжаргалын гэр бүлийнхэн ирээд байгаа аж. Шүүх хуралдааныг хэвлэлийнхэнд хаалттай явуулах шийдвэр гарчээ.

Эргэн сануулахад энэ сарын 16-нд буюу өнгөрсөн лхагва гарагт ЦЕГ-ын Эдийн засгийн гэмт хэрэгтэй тэмцэх тасгийнхан баривчилсан. Тэрбээр одоо  Цагдан хорих 461 дүгээр ангид хоригдож байгаа билээ.

Албаны эх сурвалжийн мэдээлж буйгаар АТГ болон ЦЕГ-ын Эрүүгийн цагдаагийн газраас гарсан хамтарсан ажлын хэсгийнхний мөрдөн байцаалтын явцад Л.Түвшинжаргал нь хэрэгтэй хавсаргасан хууль бус гэгдэх бичиг баримтыг хуурамчаар үйлдсэн, бүрдүүлсэн байж болзошгүй гэх сэжүүр илэрсэн тул барьвчилсан байна.

Мөн  Л.Түвшинжаргал, “Натур фрэйндли” компанийн гурван ажилтан зэрэг дөрвөн хүнийг УИХ ын гишүүн Х.Баттулгыг Үйлдвэр хөдөө аж ахуйн сайдаар ажиллаж байх хугацаанд Сайншанд аж үйлдвэрийн цогцолборын ажлыг эхлүүлэхтэй холбоотойгоор улсад таван тэрбум төгрөгийн хохирол учруулсан байж болзошгүй гэж үзэж байгаа болохыг ч эх сурвалж хэллээ.