УИХ-ын гишүүн, УИХ дахь Ардчилсан намын бүлгийн дарга Б.Гарамгайбаатарын энэ удаагийн иргэд сонгогчидтой уулзах уулзалт Хэнтий аймгийн Бор-Өндөр сумаас 2016 оны 3 дугаар сарын 15-ны өдөр эхэллээ. Тэрбээр энэ сарын эхээр мөн аймгийнхаа 6 сум, 1 багийн иргэдтэй уулзалт ярилцлага хийж ажлаа тайлагнаж явсан гэдгийг дурдаад, энэ удаад нийт 9 сумын иргэдтэй уулзалт хийж, тайлангаа танилцуулах, тэдний санал бодлыг сонсохоор тойрон ажиллаж байгааг ажлын албаных нь хүн хэлж байсан юм.

УИХ-ын гишүүн Б.Гарамгайбаатар нэгдүгээрт, УИХ-ын гишүүнийхээ хувьд хийсэн ажил, санаачилсан, батлалцсан, ажлын хэсгийг нь ахалсан хуулиудаа танилцуулж, хоёрдугаарт, Ардчилсан намын Засгийн эрх барихдаа хийж бүтээсэн бүтээн байгуулалт, хууль эрх зүйн орны шинэчлэл зэргийг тоймлон хүргээд, гуравдугаарт, Хэнтий аймагтаа хийсэн ажил, бүтээн байгуулалтаа танилцуулж байлаа. Иргэд сонгосон гишүүнийхээ ажлын тайланд сэтгэл хангалуун байсан юм. Б.Гарамгайбаатар дарга хоёр жил гаруй хугацаанд УИХ-ын Эдийн засгийн байнгын хорооны даргаар ажиллахдаа энэ парламентын үед шинэчлэгдсэн банк санхүү, эдийн засгийн чиглэлийн томоохон хуулиудыг биечлэн хариуцаж байснаа онцлоод одоо хэрэгжиж буй НӨАТ-ын хуулийг анх санаачилснаа дурдаж байлаа. Тэрбээр ажлаа тайлагнахын зэрэгцээ иргэд болон орон нутагт тулгамдаж байгаа асуудлуудад хариулт өгч байлаа.

Хэнтий аймгийн Бор-Өндөр сум нь нийт 8648 хүн амтай, анх Хэнтий аймгийн Дархан сумын нутагт үйлдвэрийн роайнаар төвлөрч байсан ч сүүлд 2012 онд иргэдийнхээ хүсэлтээр бие даасан сумын статустай болсон байна. Энэ суманд хийсэн уулзалтын үеэр иргэд хамгийн ихээр газар нутаг, бэлчээрийн хүрэлцээ байхгүй байгаа талаар асуудал хөндөж байлаа. Мөн иргэд "Ажлын байр бий болгох томоохон хэмжээний хоёр үйлдвэр суманд нь барихаар төлөвлөж байгаад баяртай байна. Гэхдээ бодит ажил хэрэг болгох хэрэгтэй. Хүлээж байгаа гэдгийг захиж байсан юм. УИХ-ын гишүүн Б.Гарамгайбаатар өөрийн сонгогдсон тойрог Хэнтий аймгийнхаа бүх сумдын иргэдтэй жилдээ нэг удаа заавал ирж уулздагт иргэд ам сайтай байлаа.