Сүхбаатар аймгийн Эрдэнцагаан болон Дорнод аймгийн Матад сумын заагт орших Загийн хоолой гэдэг газар өнөөдөр үдээс өмнө 12.00 цагийн орчимд түймэр дэгджээ.
Тухайн үед түймрийн улмаас тус бүс нутагт хаваржиж байсан нэгэн малчин айлын гэр болон хашаа бүхэлдээ шатсан байна. Малын хашаанд ойролцоогоор 60 орчим бог мал хашаатай байсан бөгөөд бүгд шатсан, гал гарах үеэр гэрийн эзэд гэртээ байж таараагүй учир азаар хүний амь нас эрсдээгүй гэдгийг орон нутаг дахь эх сурвалж мэдээллээ.
Уг түймэр дэгдэх үед Матад сумын нутаг дэвсгэрт үйл ажиллагаа явуулж буй нефт олборлолтын "Дачин тамсаг" ХХК ийн ажилчид түймрийг унтраахаар 7 автомашин, 35 хүний бүрэлдэхүүнтэйгээр өдрийн 13.00 цагаас оройн 20.00 цаг хүртэл ажилласан байна. Мөн энэ үеэр Матад сум болон Сүхбаатар аймгийн онцгой байдлын албаныхан хүч нэмэгдүүлэн ажилласан аж. Гэсэн ч оройн 17.00 цагийн орчимд гал гарсан бүс нутагт хүчтэй салхи салхилж галын хамрах хүрээ цааш тархан түймрийг унтраах боломжгүй болсон байна.
