Архангай аймгийн төв Цэцэрлэг хотод өнгөрсөн жил дугуйн зам тавигдсан. Энэ нь гудамж төслийн хүрээнд хийгдсэн ажил бөгөөд аймгийн төвөөс гэр хороолол руу чиглэсэн явган хүний замаас гадна дугуйтай иргэд тус замаар зорчих боломжтой болжээ. Тэгвэл энэ замаар УИХ-ын дарга З.Энхболд, УИХ-ын гишүүн Н.Батбаяр нар зорчиж, аймгийн төвийг тойрчээ. Мөн тэдний хамтаар Архангай аймгийн ИТХ-ын дарга Ч.Мөнхбат, аймгийн Засаг даргын орлогч М.Батжаргал нар зорчсон байна.

Энэ тухай Улсын Их Хурлын дарга З.Энхболд "Аймгийн удирдлагууд иргэддээ эрүүл амьдралын хэв маягийг хэвшүүлэх зорилгоор дугуй унахыг уриалж, шинэ төлөвлөлтдөө дугуйн замыг төлөвлөсөн байна.Тиймээс аймгийн удирдлагууд дугуй унахыг уриалж байна" гэжээ.

Монгол Улсын Их Хурлын дарга З.Энхболд энэ сарын 18-23-ны өдрүүдэд Өвөрхангай, Баянхонгор, Говь-Алтай, Завхан, Архангай аймгуудад ажиллажээ. Тэрээр энэ үеэр орон, нутгийн ажил байдал, үйлдвэрүүдийн үйл ажиллагаатай танилцсан байна.