Зэвсэгт хүчний 027 дугаар анги буюу Батлан хамгаалах, хууль сахиулах алба хаагчдын нэгдсэн эмнэлгийн шинэ байрыг ашиглалтад хүлээн авах ёслол өнөөдөр боллоо.

Ёслолын арга хэмжээнд УИХ-ын гишүүн, Засгийн газрын гишүүн, Батлан хамгаалахын сайд Ц.Цолмон, ЗХЖШ-ын хошууч генерал Д.Даваа, Батлан хамгаалах яамны Төрийн нарийн бичгийн дарга, хурандаа Б.Батсайхан болон албаны бусад хүмүүс оролцов. 

Салбарын сайд Ц.Цолмон, “Австрийн Засгийн газраас 17 тэрбум төгрөгийн тоног төхөөрөмж, рентген аппаратуудыг тусламжаар өгсөн. Ингэснээр улсын жишигт хүрсэн хоёрдугаар шатлалын эмнэлэг болох боломж бүрдлээ. Цаашдаа ч үргэлжлүүлэн эмнэлгийн тоног төхөөрөмжийг тусламжаар авах яриа хэлэлцээр хийнэ. Мөн яамны шугамаар эмнэлгийн холбогдолтой бусад худалдан авалтыг хийх юм. Энэ бүхнийг хийж дууссаны дараа шинэ эмнэлэг маань үндсэн үйл ажиллагаагаа явуулж эхэлнэ” гэв.

“Баярс консракшн"-ы Ерөнхий захирал Н.Баянсайхан, ”Бид дулаалгийн шинэ технологи үйлдвэрлэж, түүгээрээ барьсан учраас барилга маань эрчим хүчний хэмнэлттэй, дулааны зардал багатай. Түүнчлэн 3 давхар шил бүхий өвөрмөц технологи нэвтрүүлж чадсан. Ганцхан барилга барих зардлаар бид гурван обьект барьсан. Энэ бол үндэсний бүтээгдэхүүнүүдийг ашигласны үр дүн юм” гэлээ. Барилгын зураг төслийг “Голомт өргөө” ХХК гаргаж, “Баярс констракшн” барьж гүйцэтгэжээ. 2011 оноос эхэлж барьсан уг барилга 2013 онд ашиглалтад орох ёстой байсан ч гүйцэтгэгч талаас хамааралтай хугацаа алдсаар ийнхүү өнөөдөр нээлтээ хийж байна.

Орчин үеийн шаардлагад нийцсэн энэхүү шинэ байр нь 500 гаруй ортой, 28 мянга 500 м.кв талбайтай бөгөөд нийт 17 тэрбум төгрөгөөр босчээ. Мөн тус барилга нь А,Б,В гэсэн гурван блокоос бүрдэх бөгөөд А блокод хэвтэн эмчлүүлэгчид, Б блокод амбулатори, В блокод усан болон физик эмчилгээ, спорт заал байх юм.