“Монгол циркийн хөгжлийн төв” төрийн бус байгууллага,  Монголын үндэсний цирктэй хамтран зохион байгуулдаг “Дэлхийн цирк Монголд 2016” олон улсын циркчдийн хамтарсан тоглолт гурав дахь удаагаа болох гэж байна. Тоглолт энэ сарын 26-наас дөрөвдүгээр сарын 10-ны хооронд үргэлжлэх юм. Хамгийн анхны тоглолт маргааш 15.00 цагт Циркт эхэлнэ.

Тоглолтод АНУ, Франц, Англи, Испани, БНХАУ, ОХУ, Узбекстан, Казакстан, Бельги, Бразиль, Өмнөд Африк, Монгол улс зэрэг 15 орны, олон улсын нэр хүндтэй өндөр зэрэглэлийн тэмцээнүүдийн эхний байруудын шагналт 60 гаруй жүжигчин оролцох юм.

Тус тоглолтод ямар амьтад оролцох нь олны анхаарлыг ихээхэн татаад байна. Тэгвэл энэ удаагийн тоглолтод Казакстан улсын Астанагийн циркийн жүжигчин, удам дамжсан амьтан сургагчид болох Өселбаева /Тунгалаг/, хүү Мухтар нар араатны хаан арслангуудтайгаа, Узбекстаны амьтан сургагч, жүжигчин Рамис Шагаев Чарли нэрт лам гөрөөс, Люси нэрт сармагчин болох тэдэнтэй хамт тоглох өхөөрдөм хөөрхөн пони буюу одой морьд, сармагчингууд, тоомсог морьд зэрэг амьтад оролцож ур чадвараа үзүүлэх аж.

Тоглолтод оролцох Узбекстаны амьтан сургагч, жүжигчин Рамис Шагаевтай товч ярилцсанаа хүргэе.

-Та энэ тоглолтонд ямар амьтадтай оролцох гэж байна вэ?

-Би энэ тоглолтонд гурван сармагчин, хоёр одой морь, нэг лам гөрөөстэй оролцохоор ирсэн.

-Амьтад ямар үзүүлбэр үзүүлэх талаар сонирхуулаач?

-Одой морьдын хувьд хэвтэх, босох, хоёр хөл дээрээ явах гэх мэтийн арай хөнгөн үзүүлбэр үзүүлнэ. Харин сармагчингуудын хувьд байгалиасаа маш их хөдөлгөөнтэй, аливаа зүйлийг хурдан сурдаг амьтан учраас ихэвчлэн жонглёрын төрлийн үзүүлбэр үзүүлнэ.

-Та бүхэн тоглолтод оролцох амьтдаа хэдий хугацаанд сургасан бэ?

-Сармагчингуудыг ихэвчлэн 1-2 жилд сургаж байж манеженд гаргадаг. Энд нэг зүйл нэмж хэлэхэд Америк тэмээ гэгддэг Австралийн лам гөрөөс их аймхай, халирамхай амьтан учраас сургахад хэцүү байдаг. Гэхдээ монгол улсад анх удаа ирж тоглох гэж байгаадаа маш их баяртай байна хэмээсэн юм.  

Энэхүү тоглолт хэдийгээр гурав дахь жилдээ зохиогдож байгаа хэдий ч оролцож буй жүжигчдийн бүрэлдэхүүний хувьд жил бүр 100 хувь шинэчлэгддэг гэдгийг зохион байгуулагчид онцолсон юм. Тухайлбал олон улсын тэмцээний 3 алт, нэг мөнгөн медальт Хятад улсын жүжигчний сул утсан дээрх тэнцвэр, 3 мөнгөн цомын эзэн гоцлол агаарын гимнастикийн төрөлд дэлхийд чансаагаараа нэгт бичигддэг Испанийн жүжигчний үзүүлбэр зэрэг олон гайхалтай үзүүлбэрүүд тоглогдох юм. Түүнчлэн тоглолтын үеэр арслан морь унаж, сармагчин жонглёр тоглох бол лам гөрөөс, одой морьдын сонирхолтой үзүүлбэр тоглогдоно гэдгийг зохион байгуулагчид онцолсон.