“ТV-9” телевизийн “Монгол коммент” нэвтрүүлгийн хөтлөгч М.Батбилэгийнхээ төлөө нэгдэцгээе хэмээн хамтран ажиллагч, найз нөхөд нь уриалж байна.

М.Батбилэгийн гэр бүлийн хүн Г.Наранбилэг өнгөрсөн хугацаанд зөөлөн эдийн хавдар өвчний улмаас Тайландад эмчилгээ оношлогоо хийлгэж байгаад одоо Солонгост химийн эмчилгээнд оржээ. Эхнэрээ сахихаар өнгөрсөн нэгдүгээр сард чөлөө аваад явахад хамт олон, найз нөхөд нь чадах чинээгээрээ хамжилцсан ч урт хугацаанд зардал өндөртэй эмчилгээг үргэлжлүүлэн хийлгэхээр байгаа билээ. Тиймээс нөхөд нь түүнийг ятгаж, хоорондоо зөвлөж байгаад ийнхүү ард түмэндээ хандаж байна. Зовох цагт нь анд нөхөртөө чин сэтгэлийн дэм үзүүлж, чадах чинээгээрээ тус болцгооё хэмээн уриалж ХААН банк 5007453924, “Голомт” банк 1109126632 хандивын дансыг нээжээ. Мөн Билэгээгийнхээ гэр бүлд тусалцгаая пэйжид 4000 гаруй хүн нэгдээд байна.

Одоогоор М.Батбилэгийн гэргий Г.Наранбилэгийн эмчилгээнд 100 орчим сая төгрөг зарцуулаад байна. Одоо химийн тарианы эмчилгээ хийлгэж байгаа бөгөөд нэг тариа нь 5,4 сая вон буюу 9,7 сая төгрөгийн үнэтэй юм. Хорин нэг хоноод нэг удаад тус тариаг хийлгэнэ. Зургаан удаагийн тариа нэг курс эмчилгээ болно. Мөн хоёр сар тутам бүтэн биений шинжилгээ өгөх аж. Тус эмнэлгээс 120 сая вон буюу 250 орчим сая төгрөгийн тариа санал болгож байгаа боловч санхүүгийн нөхцөл байдал түүнийг хэрэглэх боломжгүй байгаа юм байна.