Хан-Уул дүүргийн ИТХ-ын даргын санаачилгаар Ерөнхий боловсролын сургуулиудын ахлах ангийн сурагчдын дунд жил бүр уламжлал болгон зохион явуулдаг “Аварга анги” спортын наадам өнөөдөр Буянт-Ухаа спортын ордонд эхэллээ.
3 дахь жилдээ зохиогдож байгаа уг тэмцээнд Хан-Уул дүүргийн ЕБС-ийн эрэгтэй, эмэгтэй баг тамирчид сагсан бөмбөг, ширээний теннис, шатар, гар бөмбөг гэсэн 4 төрлөөр 3 бүсэд хуваагдан өрсөлдөх юм. Тэмцээнд ангийн нийт сурагчдыг татан оролцуулахын тулд нэг хүүхэд спортын нэг төрөлд оролцох журам баталсан байна. Хан-Уул дүүргийн “Аварга анги” энэ сарын 29-31-ний өдрүүдэд Буянт-Ухаа спортын ордон болон дүүргийн Биеийн тамир, спортын ордонд спортын төрөл тус бүрт тодроно.
ХУД-ийн ИТХ-ын дарга Д.Батбилэг: “Энэ жилийн Аварга анги-2016 спортын наадам өмнөх жилүүдээсээ илүү өргөн цар хүрээтэй болж байгаа нь заал дүүртэл ирсэн хүмүүсээс харагдаж байна. Мөн манай тэмцээний бас нэг онцлог бол зөвхөн ИТХ-ын төлөөлөгчид зохион байгуулаад зогсохгүй өөрсдөө хамт оролцож байгаагаар онцлогтой. Аварга анги-2016 спортын их наадмыг төлөвлөсний дагуу 4 төрлөөр явуулж аваргаа шалгаруулна. Өнөөдрийн спортын наадмын хувьд дүүргийн бүх ЕБС-ийн сурагчид хамрагдаж маш өргөн цар хүрээтэйгээр спортын наадам болж байна. Хамгийн чухал нь Аварга ангийн тамирчидаа ангийн багш нь дасгалжуулагчийн үүргийн гүйцэтгэн оролцож байгаа онцлог чухал юм” гэлээ.
ХУД-ийн ГХС-тай 18-р дунд сургуулийн Биеийн тамирын багш Д.Баярмаа: “Аварга анги спортын наадам жил ирэх тусам өргөжиж багш сурагчид ч энэ тэмцээнд ач холбогдол ихээхэн өгдөг болсон байна. Манай сургуулийн хувьд дүүргээс зохион байгуулдаг олон тэмцээн уралдаанд тогтмол амжилттай оролцсоор ирсэн. Энэ удаад ч тэр амжилтаа бататгана гэж хүүхдүүддээ найдаж байгаа. Ер нь дүүргийн удирдлагууд иймэрхүү нийтийн биеийн тамирыг хөгжүүлэх тал дээр чухал ач холбогдол өгч ажиллаж байгаад баяртай байгаа.
Энэхүү спортын наадам нь Ерөнхий боловсролын сургуулийн ахлах ангийн сурагчдын чөлөөт цагийг зөв боловсон өнгөрүүлэх, бие бялдарыг хөгжүүлэх, тэднийг биеийн тамир спортод татан оролцуулах зорилготой юм. Барагтаа бол дүүрдэггүй манай хамгийн том спорт заалыг дүүргэж чадсан нь хүүхэд залуус, сургуулийн удирдлагууд тус тэмцээнд хэрхэн ач холбогдол өгч байгаа нь харагдаж байлаа. Бусад дүүргүүд ч мөн адил ХУД-ээс санаа авч нийтийн биеийн тамир спортыг хөгжүүлэх ёстой нь энэ арга хэмжээнээс харагдаж байлаа.
