Их Монгол улсын хоёрдугаар их хаан, Чингис хааны гуравдугаар хөвгүүн Өгөөдэйн мэндэлсний 830 жилийн ойд зориулан Зоос сонирхогчдын холбоо, Монголбанк хамтран 925-ын сорьцтой, 25 грамм дурсгалын мөнгөн зоос гаргалаа. Зоосыг өнгөрсөн баасан гарагт “Арт хаус” төвийн үзэсгэлэнгийн танхимд нээж 120 мянган төгрөгөөр худалдсан юм. Зоос 10 мянган төгрөгийн нэрлэсэн үнэтэй, 2500 ширхэг хэвлэсэн байна. Олон улсад дурсгалын зоосыг 2000-2500 ширхэгээр хэвлэдэг аж. Хийц, хэлбэр, орц найрлагаас нь хамаараад үүнээс ч цөөхөн хэвлэх тохиолдол байдаг байна. Олон улсад дурсгалын зоосны дундаж хэмжээ нь мөнгөн зоос 38.61 мм-тэй байдаг бол алтан зоос үүнээс арай жижиг хэмжээний диаметртэй байдаг аж.

Манай улсын хамгийн том зоос нь 999 сорьцтой, 12 жилийн амьтны дүрстэй гурван кг мөнгөн зоос байжээ. 1996 онд ирвэс, бүргэд, тахь, хавтгай гэсэн дархан цаазтай амьтдыг өнгөтөөр хэвлэсэн нь манайд өнгөт зоосны эхлэл болсон гэхэд болно. Үүнээс хойш 2008 оны Бээжингийн олимпийн аваргуудад зориупсан зоосыг өнгөтөөр хэвлэсэн байдаг. Мөн 2007 онд гаргасан нохой зээхийн дүрстэй зоосны нохой зээхийн нүдийг нь сваровски шигтгээтэй бүтээсэн нь хамгийн анхны шигтгээтэй зоос болов. Үүнээс хойш өнгөтэй, шигтгээтэй, төвийлгөж хийсэн гэх мэт технологийн хөгжлийг харуулсан зооснууд гарсан байна.