“Худалдаа хөгжлийн банк”-ыг дээрэмдэхийг завдсан хэрэг гарчээ.

Тодруулбал, өнгөрсөн сарын 31-ны өдөр Сонгинохайрхан дүүргийн 15 дугаар хороонд байрлах “Худалдаа хөгжлийн банк”-ны салбарт юүдэнтэй улаан цамц, хар богино хүрэм, хар өмд, хар алаг пүүзтэй, гартаа урт буу мэт зүйлийг даавуугаар ороож барьсан эрэгтэй хүн орж ирээд мөнгө нэхэж байгаад гарч зугтаасан байна.

Үүний дагуу цагдаагийн алба хаагчид шуурхай ажиллан, хэргийг иргэн Б гэгч үйлдсэнийг тогтоон, баривчилжээ. Одоогоор уг хэргийг тус дүүргийн цагдаагийн гуравдугаар хэлтэст шалгаж байгаа юм. Уг хэргийг үйлдсэн Б нь хулгайн гэмт хэрэгт шалгагдаж байгаад батлан даалтад гарсан этгээд байсан гэдгийг Цагдаагийн ерөнхий газрын хэвлэл мэдээллийн төвд Улаанбаатар хотын цагдаагийн газрын Гэмт хэрэгтэй тэмцэх асуудал эрхэлсэн дэд дарга, цагдаагийн хурандаа Б.Даваажав мэдээлэв.

Энэ оны эхний гурван сарын байдлаар Нийслэл хотын хэмжээнд 112 дээрмийн гэмт хэрэг бүртгэгдсэн нь нийт гэмт хэргийн 2.3 хувийг эзэлж байна. Нийт гарсан дээрмийн гэмт хэргийг урьд оны мөн үетэй харьцуулбал 32 нэгжээр буюу 22,2 хувиар буурсан байна.

Илрүүлэлт 56,6 хувь буюу 9.8 хувиар өссөн үзүүлэлттэй байна. Улаанбаатар хотод 2016 оны нэгдүгээр улиралд 4909 гэмт хэрэг бүртгэгдсэн нь 3,4 хувьд буурсан. Улсын хэмжээнд бүртгэгдсэн хэргийн 68,1 хувь нь Улаанбаатарт  үйлдэгдсэн нийт хэргийн 37,8 хувь нь хулгайлах  гэмт хэрэг байгаа юм. Дээрэмдэх гэмт хэрэг эхний нэгдүгээр улиралд  22,2 буурч, илрүүлэлт 9,8 хувь өссөн байна. Галт зэвсэг хэрэглэсэн банк ломбард руу довтолсон гэх хэргүүдийг цагдаагийн байгууллага илрүүлэн шалгаж байна.