“Ирвэс хамгаалах сан”-гийн биологич Т.Лхагвасүмбэрэл агсан учир битүүлгээр амиа алдсан хэргийг цагдаагийн байгууллагаас шалгаж байгаа ч өнөөдрийг хүртэл нааштай хариу гараагүй байгаа.

Тиймээс ч энэ хэргийг ямар нэгэн байдлаар хэрэгсэхгүй болгож, түүний үхлийн шалтааныг үнэн мөнөөр тогтоохгүй байх вий гэсэн айдас, хардлага олон нийтийн дунд байгаа юм. 

Тэгвэл өчигдөр талийгаач залуугийн төрсөн өдөр тохиожээ. Хэрвээ тэрбээр амьд сэрүүн байсан бол 28 хүрэх байсан аж. Харин хайртай хүүгийнхээ төрсөн өдөрт нь зориулж аав Ж.Төмөрсүх “Миний хүүгийн энэхүү ХӨЛС бол алдарт Тост,Тосон бумбын нурууг ард иргэдэд үлдээх, хайртай цоохор ирвэс, ижил дасал болсон аргаль, янгируудаа аврахын тулд асгаруулсан ясны, сэтгэлийн, ажилсаг чанарын ЭХ ОРОН Ч ХӨЛС байсан юм шүү.

Тийм ч учраас хүүгийн минь төрсөн энэхүү 04 сарын 06-ны өдөр Монгол Улсын УИХ-ын БОХХАА Байнгын хороогоор Тост Тосон бумбын нурууг улсын тусгай хамгаалалтанд авах асуудал хэлэлцэхээр цаг хугацаа давхцан тохиож байгаа нь их л учир тавилантай болж байна гэж ихэд бэлэгшээн нэг ч хүсэл зорилго нь биелэлээ олно гэж найдаж байна. Энэ нь монгол төрийн, монголын ард түмний том бэлэг болно. Та бүхэн сэтгэлээсээ дэмжээрэй” гэж цахим хуудсандаа бичжээ.