Зам, тээврийн яамныхан ирэх долоо хоногоос ажилдаа унадаг дугуйгаар ирж, буцдаг болох нь. Тэд энэ долоо хоногт багтаан, гаднаа дугуйн зогсоол байгуулахаар ажилдаа оржээ. Ийм эко унаа хөлөглөх хүсэлтэй ажилтнуудад хувцас солих өрөө гаргаж өгөхөөр болсон байна. Энэ асууддыг ажил хэрэг болгох үүргийг тус яамны Төрийн захиргааны удирдлага, хууль эрх зүйн газрын дарга Н.Ганибал, Авто тээврийн үндэсний төвийн дарга Н.Пунцаг нар хүлээжээ. Үүгээр тогтохгүй унадаг дугуйг тээврийн бусад хэрэгсэлтэй адил хөгжүүлэх, аюулгүй байдлыг хангах талаар бодлогын баримт бичиг, мастер төлөвлөгөө боловсруулах аж. Одоо Улаанбаатар хотод 120 мянгатын уулзвараас Үндэсний цэцэрлэгт хүрээлэн хүртэл, Нарны зам дагуу дугуйн зам байгуулахаар ЗТЯ төлөвлөөд буй.