Монголд жилдээ 5500 орчим хүн хорт хавдартай гэж оношлогдож буй. Үүний 7.5 хувь нь хожуу шатандаа буюу найдваргүй болсон хойноо эмнэлэгт ханддаг нь харамсалтай. Өөр хэлбэл, хорт хавдартай дөрвөн хүн тутмын гурав нас бардаг гэсэн үг. Тиймээс Хавдар судлалын үндэсний төвийн ачаалал жил ирэх тусам нэмэгдэж, Засгийн газар, ЭМЯ (хуучнаар) уг эмнэлгийг өргөтгөх шийдвэр 2011 онд гаргаж байв. Ингээд шав тавьсан хэрнээ 2013, 2014 онд улсын төсвөөс ганц ч төгрөг гаргаж өгөөгүй. Харин энэ онд тэрбум гаруй төгрөг төсөвт тусгаснаар барилгын ажил эрчимтэй явагдаж буй гэж ЭМСЯ-ны Төрийн нарийн бичгийн дарга С.Ламбаа хэлэв.

Тус төвийн өргөтгөлийн баршлга А, Б, Ц блокоос бүрдэж буй. С.Ламбаа “А болон Б блокийн дотор талыг засаж байна. С хэсэг буюу туяа эмчилгээний тоног төхөөрөмж байрлах бункер нэг давхраас бүрдэх юм. Одоо цутгалт хийгдэж байгаа. Барилгын ажил гүйцэтгэж буй “Зүр” компанийнхан зургадугаар сарын 30 гэхэд ажлаа дуусгах амлалт өгсөн” гэж ярив. Тус өргөтгөлийн барилга нийт дөрвөн давхар, 5200 ам метр талбайтай. Ашиглалтад орсноор элэгний хавдрын мэс засал, туяа болон химийн эмчилгээний хүртээмж сайжрах юм.