Хэнтий аймгийн Биндэр, Дорнодын Баян-Уул сум, Сүхбаатар аймгийн Эрдэнэцагаан суманд улсын төсвийн хөрөнгөөр хэрэгжүүлж буй “Сумын төвийн шинэчлэл” төслийн явц хангалтгүй, хийсэн ажил нь чанаргүй байна гэнэ. Дээрх гурван суманд хэрэгжүүлж буй төслийн явцыг Барилгын хөгжлийн төвөөс шалгахад цөөнгүй зөрчил илэрчээ. Биндэр суманд гэхэд инженерийн шугам сүлжээ шинэчлэх, шинээр барихдаа Барилгын тухай хууль болон зарим норм, дурэм зөрчиж, зураг төсөлгүй гүйцэтгэсэн байна. Цаашид зураг төслийг нь баталгаажуулан, түүнийхээ дагуу ажил гүйцэтгэх, байгаль орчны нэгдсэн үнэлгээ хийлгэх шаардпага тулгарчээ. Баян-Уул суманд гэхэд авто замын зарим хэсгийг өвөл тавьснаас асфальт бутарсан гэнэ. Тэгвэл Эрдэнэцагаан суманд бохир усны 2800 метр шугам угсарсан ч шаардлага хангаагүй тул буцаан аваад, хөрсний ёроолыг нягтруулан, элс дэвсэх болжээ. Мөн сумын төвийн усны чанар эрдэсжилт өндөртэй, хатуулаг ихтэй байтал ажлын зурагт ус цэвэршүүлэх төхөөрөмж тусгаагүй аж.

Барилгын хөгжлийн төвийнхөн чанаргүй гүйцэтгэсэн ажлыг дахин хийлгэхээс гадна санхүүжилтийг нь бодит ажилтай тулгахаар болжээ. Үүний тулд тухайн орон нутгийнхан болон гүйцэтгэгч байгууллагуудад нь зөрчлийг арилгуулах шаардлага тавьж эхэлсэн байна.

Дашрамд дурдахад, 2014 оны Төсвийн тухай хуульд 16 аймгийн тус бүр нэг суманд “Сумын төвийн шинэчлэл” төсөл хэрэгжүүлэхээр 80 тэрбум төгрөг тусган баталж байсан билээ. Барилга, хот байгуулалтын сайд өнгөрсөн онд тушаал гаргаж, 16 сумын төвийг шинэчлэх захиалагчийг Барилгын хөгжлийн төвд шилжүүлсэний дагуу тэднийх хянаж буй юм байна.