Засгийн газраас 2014 онд Дорнод, Сүхбаатар, Өмнөговь, Хөвсгөл, Говь-Алтай, Завхан гэсэн 6 аймгийн төвийг Улаанбаатар хоттой хатуу хучилттай автозамаар холбох зорилт тавин ажилласан. Энэхүү ажлын хүрээнд өнөө хэр дуусаагүй үлдээд байсан Дорнодын 143 км замыг энэ жилдээ багтаан дуусгахаар болжээ. Дорнодын замын ажлыг 2009 онд эхлүүлсэн ч өнгөрсөн жил газар шорооны ажил нь 100 хувь, хучилтын ажил 60 хувьтай байсан аж.

Ерөнхий сайд Ч.Сайханбилэг өнгөрсөн сард Дорнод аймгийн иргэдтэй уулзах үеэрээ "Нийслэл хотыг тус аймагтай холбох хатуу хучилттай замыг долдугаар сард бүрэн ашиглалтад хүлээн авна" гэж мэдэгдсэн. Тиймээс Шийдлийн Засгийн газар 2016 онд хийгдэх 1014 км зам, гүүрийн ажлаасаа хамгийн эхэнд Дорнодын замыг ашиглалтад оруулахаар төлөвлөжээ. Анх нэг компани дангаараа гүйцэтгэлийн ажлыг авсан ч энэ жил таван компани нэг зэрэг ажиллаж байгаа юм байна.

Замын ажлын нээлтийг ирэх 18-ны өдөр тус аймгийн Хөлөнбуйр сумаас зохион байгуулахаар болжээ. Харин Өндөрхаан-Чойбалсангийн чиглэлийн замын барилгын захиалагчаар Зам тээврийн яам, санхүүжүүлэгчээр Хөгжлийн банк ажиллаж байгаа юм байна. Төслийн гүйцэтгэгчээр “Насны зам”, “Бадрал ойл”, “Өвөр залаат”, Хансуун зам”, “Арж капитал” компаниуд шалгаран ажиллаж байгаа аж.

Т.Энхэлээ