Улаанбаатар хотыг 2020 он хүртэл хөгжүүлэх ерөнхий төлөвлөгөөнд нийслэл хотыг найман дэд төвтэй байхаар төлөвлөсөн. Энэ ажлын хүрээнд Баянхошуу, Долоон буудал орчим эхний ээлжийн дэд төвүүдийг байгуулахаар нийслэлийн ЗДТГ, Азийн хөгжлийн банктай хамтран төсөл хэрэгжүүлж байна. Төслийн хүрээнд иргэдийг түр суурьшуулах хоёр орон сууцыг барьж ашиглалтад оруулахад бэлэн болжээ. Энэ талаар “Гэр хорооллыг хөгжүүлэх хөрөнгө оруулалтыг дэмжих хөтөлбөр” төслийн зохицуулагч, НИТХ-ын төлөөлөгч Л.Сайнтөгсөөс тодрууллаа.
-Дэд төв байгуулах газар амьдарч байгаа өрхүүдээс түр суурьшуулах орон сууцанд хэдэн айл орох боломжтой вэ?
-Хоёр дэд төвийн бүтээн байгуулалтын ажлын зураг төсөл ерөнхийдөө бэлэн болоод батлагдах шатандаа яваа. Бүтээн байгуулалт хийх газарт маань одоо айлууд оршин сууж байгаа учраас айлуудыг нүүлгэн шилжүүлэх шаардлагатай байгаа. Тиймээс эхний ээлжид нүүлгэн шилжүүлэлтэд өртсөн айлуудаа оруулах 50 айлын орон сууцыг нийслэлийн ЗДТГ өөрийн хөрөнгөөр барьсан. Одоо комисс ажиллаж байна, айлууд нь удахгүй орох байх.
-Дандаа нэг өрөө орон сууц уу?
-Энэ байрууд 1-2 өрөөний сонголттой. Байрны нэгдүгээр давхарт хорооны удирдлага болон өрхийн эмнэлэг, цагдаа байрлана. Мөн бялдаржуулах болон иргэний танхим гэсэн зохион байгуулалттай.
-Түрээсийн орон сууц гэж ойлгож болох уу?
-Үгүй, түрээсийн орон сууц биш. Нүүлгэн шилжүүлэлтэд өртсөн айлууд түр суурьших учраас ашиглалтын зардлаа л төлнө. Түрээс гэх зэрэг өөр нэмэлт төлбөр байхгүй. Гэхдээ зарим айл бүр оршин суух санал тавьж байгаа.
-Тухайн орон сууцанд бүр орно гэвэл саналыг нь хүлээн авах боломжтой юу?
-Ийм саналыг зөвшөөрнө. Гэхдээ эхлээд байрны үнэлгээг гаргана. Нөгөө айл маань тухайн газраа хэдээр үнэлэх вэ гэдгийг сонсоно. Үүний дараа иргэдтэйгээ зөвшилцөж, зөрүүгээ тохиролцвол тухайн байраа авч болно.
-Айлууд байрандаа хэзээ орох вэ?
-Барилгаа комисст хүлээлгэж өгсөн, цаашдаа нийслэлийн Орон сууцны корпораци ашиглагчаар бүртгүүлээд байраа хүлээж авна. Харин оршин суух иргэдийг төслөөс сонгон шалгуулах юм. Одоогоор Азийн хөгжлийн банк, зөвлөх баг, НЗДТГ хамтраад түр оршин суух журмыг боловсруулж байна. Түр байранд оршин суух хүсэлтээ илэрхийлсэн иргэдийг эхний ээлжид оруулна. 14-20 хоногийн дотор иргэдтэй ярилцаж дуусаад, эхний айлууд орно гэж ойлгож болно.
М.Алтанцэцэг
