2012 оноос хойш 3384 км хатуу хучилттай замыг Монгол улсын газар нутагт барьсан байна. Тэгвэл энэ онд дээрх тоо 1538-аар нэмэгдэнэ гэж салбарынхан мэдээллээ. Өнгөрсөн жилүүдэд Хөвсгөл, Дорноговь, Дундговь, Баянхонгор, Өмнөговь, Сүхбаатар аймгийг Улаанбаатар хоттой хатуу хучилтай замаар холбосон. Хөвсгөл аймгийг хатуу хучилттай замаар холбосноор нийслэлээс тус аймаг хүртэлх 700 гаруй км замыг нийтийн тээврийн автобус 20-24 цагт туулдаг байсан нь богиносож 12-14 цаг болжээ. Харин энэ жил Ховд, Завхан, Дорнод, Орхон, Сэлэнгийн замыг тавих юм. Өнгөрсөн 10 жилийн хугацаанд улсын хэмжээнд жилд дунджаар 100 км хатуу хучилттай зам тавьж байжээ. Харин 2012-2015 онуудын дундаж нь 850,75 км болж өссөн ба 2016 онд 1538 км хатуу хучилттай зам барихаар замчид бэлтгэж байна. Өмнөх жилүүдэд замын ажлыг есдүгээр сард эхлүүлдэг байсан уламжлалыг энэ жил шинэчилж энэ сарын 18-нд орон даяар зэрэг эхлүүлэх аж.

Т.Энхэлээ