УИХ-ын гишүүн С.Одонтуяа Эх, хүүхдийн эрүүл мэндийн үндэсний төв болон Баянгол дүүргийн хүүхдийн эмнэлэгт ажиллалаа. Тэрбээр дээрх эмнэлгүүдийн удирдлагуудтай уулзаж, улаан бурхан өвчнийг яаралтай бууруулахад ямар арга хэмжээ авах болон шаардлагатай тоног төхөөрөмжийг хэрхэн шийдвэрлэх талаар ярилцаж шийдвэрт хүрсэн байна. БГД-ийн хүүхдийн эмнэлгийн хувьд нь ачаалал ихтэй байгаа учир тоглоомын өрөөгөө суллан хүүхдүүдээ хэвтүүлж эмчилж байгаа аж. Өнөөдрийн байдлаар дээрх эмнэлэгт хүүхдийн судас тодруулагч нэн шаардлагатай байгаа хэмээн тус эмнэлгийн удирдлагууд хэлж байна. Тиймээс УИХ-ын гишүүн С.Одонтуяа судас тодруулагч болон бусад тоног төхөөрөмжийг яаралтай нэмэгдүүлэхээр болсон байна.

БГД-ийн хувьд өнгөрсөн намар 140 ортой хүүхдийн эмнэлгийг дүүргээсээ сонгогдсон гишүүдийн санаачлага, дэмжлэгтэйгээр ашиглалтад оруулсан билээ. Уг дүүрэгт дээрх эмнэлгээс гадна дахин нэг хүүхдийн эмнэлэгийг энэ оны зургадугаар сард ашиглалтад оруулахаар төлөвлөж байгаа юм байна.

Эх, хүүхдийн эрүүл мэндийн үндэсний төвийн хувьд мөн ялгаагүй ачаалал ихтэй байна. Гэхдээ нярайн эндэгдлийг бууруулах шинэ тасаг нь улаанбурхан өвчнийг эмчлэхэд ихээхэн дөхөм үзүүлж байгаа аж. Өнгөрсөн арваннэгдүгээр сард ашиглалтад хүлээн авсан нярайн эндэгдлийг бууруулах тасагт олон улсын стандартад нийцсэн 20 төрлийн 3000 гаруй тоног төхөөрөмж, багаж хэрэгсэл, эмнэлгийн эд хогшлийг суурилуулсан. Тоног, төхөөрөмжөөс гадна тасаг доторх зохион байгуулалт, агааржуулалт бүгд орчин үеийн стандартад нийцсэн гэдэг.

Улсдаа ганцхан гэгдэх тус тасаг өмнө нь 17 дутуу нярайг хүлээж авдаг байсан бол одоо 70-80 нярайг хүлээн авах хүчин чадалтай байгаа юм. Уг тасгийг УИХ-ын гишүүн С.Одонтуяа JCI байгууллагатай хамтран тохижуулсан. Харин өнөөдөр С.Одонтуяа гишүүн уг тасгаа эргэн хүүхдийн өвчлөлийн талаар бодит мэдээлэл авч цаашид авах арга хэмжээний талаар гарц хайлаа.

Монгол улс 2008 онд улаан бурхан өвчин устлаа гэж зарлаж байсан. Энэ үед 0-6 сартай хүүхдийн ангир уураг хөхөлт 98%-тай бол өнөөдөр энэ тоо 45% болтлоо буурсан байна.  Хөхөөрөө хооллохгүй байх нь хүүхдийн дархлааг сулруулдаг. Тиймээс Монголын ирээдүй хойч болсон бяцхан үрсийнхээ төлөө эхчүүд, хүүхдээ хөхөөрөө хооллохыг эмч, мэргэжилтнүүд зөвлөж байгаа юм.

24tsag.mn