Энэ жил Ерөнхий боловсролын сургуулийг 36207 сурагч төгсч байгаа. Мөн өнгөрсөн жилийн төгсөгчидтэй нийлээд 40 мянга гаруй сурагч ЭЕШ өгөх юм.

Тэгвэл ЭЕШ ирэх зургадугаар сарын 15-нд 12:00-13:40 цагт Монгол хэл бичгийн шалгалтаар эхлэх тул ЭЕШ-ын талаарх мэдээллийг багцлан хүргэж байна. 

Элсэлтийн ерөнхий шалгалтын бүртгэл эхэлсэнтэй холбогдуулан их, дээд сургуулиуд босго оноогоо тогтоосон. Элсэн суралцахыг хүсэгчдийн сонгосон мэргэжлээс шалтгаалж 400-560 онооны хооронд хэлбэлздэг. Энэ жилийн хувьд:

            - Монгол улсын их сургууль - 560

            - Монгол улсын багшийн их сургууль - 500-600

            - Шинжлэх ухаан технологийн их сургууль - 440

            - Хөдөө аж ахуйн их сургууль - 500

            - Анагаахын шинжлэх ухааны их үндэсний сургууль - 560

            - Хүмүүнлэгийн ухааны их сургууль - 560

            - Соёл урлагын их сургууль - 400-420

            -Санхүү эдийн засгийн дээд сургууль - 620 оноогоор тус тус босго оноогоо

тогтоогоод байна. ЭЕШ-ыг 2016 он болон түүнээс өмнө ерөнхий боловсролын дунд сургууль төгссөн их, дээд сургуульд суралцаж байгаагүй иргэд өгнө. Шалгалтаа өгөхийн тулд Боловсролын үнэлгээний төвийн цахим бүртгэлд хамрагдаж, шалгалт өгөх эрхээ баталгаажуулсан байх ёстой юм.

Сонгосон мэргэжлийн дагуу шалгалт өгөх хичээлүүдийг сонгох ба шалгалт өгөх байр, анги болон суудлын дугаар бүхий бүртгэлийн хуудсыг өөрийн нууц үгээ ашиглан 2016 оны тавдугаар сарын 15-ны өдрөөс хойш  www.eec.mn сайтаас хэвлэн авна.  Хэвлэн авсан бүртгэлийн хуудаст сургуулийн захирлаар гарын үсэг зуруулж баталгаажуулсан байх ба батламж хуудасны үнэ 700 төгрөг, шалгалт нэг бүрийн үнэ 5800 төгрөгийг холбогдох дансанд байршуулна. Ингэснээр элсэгч нь ЭЕШ-ыг өгөх боломжтой болох ба энэ жил буюу 2016 онд ЕБС төгссөн бол өөрийн харьяалагдах ЭЕШ-ын байранд шалгалтаа өгнө. Харин 2016 оноос өмнө ЕБС төгссөн бол цахим бүртгэлд бүртгүүлсэн аймаг хотын харьяа ЭЕШ-ын байранд шалгалтаа өгөх юм. Харин шалгалтад орохоор ирэхдээ дараах бичиг баримтыг бүрдүүлсэн байна. Үүнд:

-Бүртгэлийн хуудас /www.eec.mn сайтаас хэвлэн авсан хуудас/

-Цахим үнэмлэх болон түүнтэй адилтгах баримт бичиг /төрсний гэрчилгээ, гадаад паспорт, цагдаагийн үнэмлэх, мөн гадаадын иргэний Монгол Улсад оршин суух түр үнэмлэх/

-Цээж зураг /цээж зураг нь 3*4 хэмжээтэй, сүүлийн 3 сарын дотор авахуулсан/

-Шалгалтын хураамжийн төлбөр буюу 7800 төгрөг төлсөн байх

-Гадаадад бүрэн дунд боловсрол эзэмшсэн бол энэ журмын боловсролын бичиг баримтыг БСШУЯ-аар баталгаажуулсан байх

-Хөгжлийн бэрхшээлтэй иргэд шалгалтад хамрагдахаар бүртгүүлсэн бол холбогдох бичиг баримтыг онлайн бүртгэлийн хугацаанд Боловсролын үнэлгээний төвд илгээх юм байна.      

ЭЕШ ирэх зургадугаар сарын 15-нд 12:00-13:40 цагт Монгол хэл бичгийн шалгалтаар эхэлж, 6 дугаар сарын 16-нд 10:00-11:20 цагт Монгол улсын түүх, 13:00-14:40 цагт Хими, 16:00-17:20 цагт Англи хэлний шалгалтаар үргэлжлэх юм. Мөн 6 дугаар сарын 18-нд 08:30-09:50 цагт Газар зүй, 11:30-13:10 цагт Математик, 14:30-15:50 цагт Биологи, 17:00-18:20 цагт Монгол хэл, 06 дугаар сарын 19-нд 08:00-09:40 цагт Физик, 11:30-12:50 цагт Нийгмийн тухай мэдлэг, 14:20-15:40 цагт Орос хэлний шалгалт тус тус авна.

Их дээд, сургуульд элсэхээр бүтгүүлсэн сурагч бүр Монгол Улсын Засгийн газрын 37 дугаар тогтоолын дагуу монгол хэл бичгийн шалгалтыг заавал өгнө. Монгол хэл бичгийн шалгалтыг өгснөөр ЭЕШ-д орох эрх нь нээгдэнэ. Харин элсэгчдийг www.eec.mn цахим хаягаар бүртгэнэ. Онлайнаар бүртгүүлж байгаа хүүхдүүд овог нэр, регистерийн дугаараа алдаатай бичиж, чанарын шаардлага хангахгүй зураг оруулах тохиолдол ихээхэн гардаг. Тиймээс шалгуулагчид бүртгэлийн журамтай сайтар танилцахыг анхааруулж байна.

Шалгалтын хариуг ЭЕШ-ын хамгийн сүүлийн шалгалт дууссан өдрөөс хойш долоо хоногийн дотор гаргах ба шалгалт өгсөн сурагчид нь өөрийн шалгалтын мэдээллийг мэссэжээр хүлээн авах боломжтой. Шалгалтын асуултуудын зөв хариултыг  www.eec.mn вебсайт болон өдөр тутмын сонин хэвлэлүүдэд нийтлэх юм. Харин ЭЕШ-ын эцсийн дүн, оноо, жагсаалтын мэдээллийг 2016 оны долдугаар сарын 1-ний өдрийн 09:00 цагаас өмнө www.eec.mn веб сайтаар нийтэд зарлаж, шалгалт өгсөн сурагчид дээрх дүнгээс өөрийгөө ямар сургуульд тэнцэж байгаагаа болон аль сургуульд суралцах боломжтойгоо мэдэж авах боломжтой. Элсэгчдэд долдугаар сарын 5-ны өдрөөс өмнө их дээд сургууль, коллежид элсэн суралцах батламж хуудсыг гардуулж өгнө.

Энэ хоёрдугаар сард БСШУЯ-наас элсэлтийн ерөнхий шалгалтын бүртгэл явагдаж байгаатай холбогдуулан нийслэл, аймгийн ЕБС-иудын төгсөх ангийн сурагчдад заавар зөвлөмж өгөх ажил зохион байгуулж байна. Мөн тус яамны статистик мэдээллийг үндэслэн энэ жил 12-р анги төгсөгчдийн мэдээллийг ЭЕШ-ын онлайн бүртгэлийн программд регистрийн дугаараар оруулсан бөгөөд шалгуулагчид регистрийн дугаараа эхэлж оруулан өөрийн хувийн мэдээллээ нягтлаж, бүртгэлд ашиглах боломжтой гэдгийг БҮТ-өөс мэдээллээ.