Аймаг, нийслэлийн ИТХ-ын сонгуульд нэр дэвшүүлэх ажиллагаа өрнөж байна. Энэ сарын 17-нд нэр дэвшигчдийг бүртгэх, эсэхээ тус тусын сонгуулийн хорооноос зарласан. Үүнтэй холбоотой гомдол, шүүмжлэл их буйн нэг нь Өмнөговь аймгийн МАН-ын хорооныхноос гарав. Тус намын хороо аймгийнхаа ИТХ-ын сонгуульд 33 хүн нэр дэвшүүлсэн ч хоёрыг нь бүртгэхээс татгалзсан аж. Аймгийн наймдугаар тойрогт нэр дэвшсэн С.Цэрэнбаяр, гуравдугаар тойрогт хүч үзсэн Б.Батаа нарыг аймгийн Сонгуулийн хороо “51-ээс дээш хувь эзэмшдэг компанийнхаа татварын өргүй гэсэн материалыг хавсаргаагүй” гэсэн шалтгаанаар хассан гэнэ. Энэ тухай Өмнөговийн МАН-ын хорооны удирдлагууд өчигдөр мэдээлэл хийлээ. Хуульд ийм материал хавсаргах заалт үгүй, гагцхүү өргүй, татварын асуудалгүй байх ёстой гэсэн шаардлага л бий юм байна. Хуульд заагаагүй материал шаардсан ч Татварын газраасаа лавлагаа аваад өгсөн гэнэ. Гэтэл “Заавал өөрсдөө авчирч хавсаргах байсан” гэсэн юм байх. Тэд энэ талаар “Сонгуулийн хороо хууль зөрчиж байна. Ялгавартай, сэтгэлгүй хандсанаас нь болж манай нам уг хоёр тойрогт нэр дэвшүүлэх боломжгүй боллоо. Хоёр гишүүн маань Захиргааны хэргийн шүүхэд хандсан” гэлээ.