Төв аймгийн Алтанбулаг сумын хоёрдугаар багийн нутаг дэвсгэр Шувуун фабрикийн орчим “Булгийн тохой” гэх газраас шатсан цогцос олдсон талаар өмнө бид мэдээлж байсан. Уг хэрэгтэй холбогдуулан өнөөдөр Мөрдөн байцаах газрын Онц гэмт хэрэг мөрдөн байцаах хэлтсийн ахлах мөрдөн байцаагч, ахмад Б.Эрдэнэбат мэдээлэл хийлээ.

Онц мөрдөн байцаах хэлтсийн байцаагчид энэхүү хэргийн эрэн суравжлах үйл ажиллагааг идэвхтэй явуулсны үр дүнд хохирогч Улаанбаатар хотын оршин суугч 53 настай, эрэгтэй “Б” болохыг тогтоожээ.

Мөн “Б”-г иргэн “Н” хутгалан амь насыг нь хохироон, бусадтай бүлэглэн зөөвөрлөн шатаасан болох нь мөрдөн байцаалтын ажиллагаар тогтоогдсон байна. Хэргийн талаар Мөрдөн байцаах газрын Онц гэмт хэрэг мөрдөн байцаах хэлтсийн ахлах мөрдөн байцаагч, ахмад Б.Эрдэнэбат “2016 оны гуравдугаар сарын 17-ны өдөр “Булгийн тохой” гэх газарт шатсан цогцос байсныг иргэн “Г”, “Х” нар харсан боловч цагдаагийн байгууллагад хандаагүй. Энэ үйлдэлд нь Эрүүгийн хуулийн тусгай ангийн 246 дугаар зүйлд заасан “Гэмт хэргийг үл мэдээлэх” гэсэн зүйл ангиар холбогдуулан шалгаж байна” гэсэн юм.

Тодруулбал, Шатсан цогцсыг олохоос сарын өмнө иргэн “Г”, “Х” нар харсан боловч цагдаагийн байгууллагад мэдэгдээгүй аж. Түүнээс болж хэргийн илрэлтэд хүндрэл гарч, сар гаруйн дараа шатсан цогцос хэнийх болох нь тогтоогдсон байна. Тиймээс цагдаагийн ерөнхий газраас иргэдэд гэмт хэргийн талаар мэдсэн, үзсэн, харсан даруйдаа цагдаагийн байгууллага болон бусад холбогдох байгууллагад мэдэгдэхийг анхааруулсан.

Ингэснээр та гэмт этгээдийг ял завших, оргон зайлах, дахин гэмт хэрэг үйлдэхээс урьдчилан сэргийлээд зогсохгүй тухайн хэргийг эрт илрүүлэхэд тус болох юм байна. Тус хэргийн мөрдөн байцаалтын ажиллагаа үргэлжлэн явагдаж байгаа ажээ.