Зөөлөн сэнтийд заларч байсан эрхмүүд ажлаасаа халагдахаараа тамга тэмдэгээ авч зугтан, аяггүй аашилдаг явдал хэвийн үзэгдэл болжээ. Энэхүү зохисгүй байдлыг Эрдэнэт үйлдвэрийн Нийгмийн асуудал эрхэлсэн дэд захирал С.Сувдаа буухиалж, ажлаасаа чөлөөлөгдсөн ч суудлаасаа буухгүй хэмээн тамгаа авч зугатжээ.

Өнгөрсөн долоо хоногт Эрдэнэт үйлдвэрт удирдлагын түвшинд халаа сэлгээ хийгдэж Совет хуралдсанаар Хөгжлийн асуудал эрхэлсэн орлогч Б.Намхайнямбууг албан тушаал сэлгэж, Нийгмийн асуудал эрхэлсэн орлогч С.Сувдааг ажлаас нь чөлөөлөх шийдвэрийг  гаргасан юм. Гэвч С.Сувдаа нь өнөөдрийг хүртэл ажлаа хүлээлцэхгүйгээр барахгүй тамга тэмдгээ авч, өрөөгөө түгжин алга болжээ. Хоёр улсын Советийн шийдвэрийг дур мэдэн зөрчиж том толгойлж эсэргүүцэж байсан түүх Эрдэнэт үйлдвэрт өмнө нь гарч байгаагүй аж.

Харин түүний энэхүү зохисгүй үйлдлийг олон нийт “С.Сувдаа нь 2012 оноос өнөөг хүртэл Эрдэнэт үйлдвэрийн Нийгмийн асуудал эрхэлсэн орлогчоор ажиллаж байсан ч ханаж, цадаагүй тул ийнхүү тамга тэмдэгээ өгөхгүй гэж зугтаж байна” хэмээн шүүмжилж байгаа юм. Ер нь дээрх дарга нарын хангамж сүүлийн үед хэрээс хэтэрч тансаглал, хувийн эрх ашгаа илүүд үзэж, албан тушаалаа эрх мэдлээ хэтрүүлэн ашигласан явдал нь ийнхүү халаа сэлгээ хийх түвшинд хүрсэнийг ч тэрбээр ухамсарлаагүй бололтой.

Дашрамд өгүүлэхэд хамгийн сүүлийн үеийн хэвлэлийн мэдээгээр С.Сувдаагийн урамшуулал цалин 1800 Евро, Улаанбаатар хотын RIVER GARDEN хороололд 2 авто машины граж бүхий 700 гаруй сая төгрөгийн байр авсан гэсэн баримт хүртэл дэлгэгдэж байсан юм.

24tsag.mn