Сүхбаатар дүүргийн зуслангий бүс болох Дамбадаржаа-Шадивлан-Хандгайт чиглэлийн 16.35 км авто зам, сэлбэ гол дээрх Шаргаморьтын 50 метр урт төмөрбетон хос гүүрийг байнгын ашиглалтад хүлээн авах ёслолын ажиллагаа өнөөдөр болов. Дамбадаржаагийн уулзараас Шаргаморьтын төмөрбетонон гүүр-Хандгайт чиглэлийн авто замыг хүлээн авах үйл ажиллагаанд нийслэлийн Засаг дарга бөгөөд Улаанбаатар хотын захирагч Э.Бат-Үүл, нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбат, дүүргийн ИТХ-ын дарга Б.Ган-Эрдэнэ, нийслэлийн Авто замын газрын дарга Д.Нанзаддорж, Сүхбаатар дүүргийн 19 дүгээр хорооны Засаг дарга Ш.Батдорж болон авто замын засварын ажлыг хийж гүйцэтгэсэн компанийн ажилтнууд болон иргэдийн төлөөлөл оролцлоо. Улаанбаатар хотын хойд зуслан чиглэлийн авто зам нь анхлан 1973 онд баригдсанаас хойш ээлжит болон их засвар хийгдээгүйн улмаас замын зорчих хэсэг бүхэлдээ бүтцийн эвдрэлд орж, тухайн замаар иргэд аюулгүй зорчих нөхцөл боломжгүйд хүрээд олон жилийн нүүр үзэж байсан юм. Энэхүү тулгамдсан асуудлыг оновчтойгоор харж хот, дүүргийн удирдлагуудын зүгээс зөв шийдвэрлэж чадсанаар хуучин 7м өргөн зорчих хэсэгтэй байсан авто замыг Дамбадаржаагийн уулзвараас Шаргаморьтын уулзвар хүртэлх 9,6 км-т авто замын зорчих хэсгийг 12м өргөн дөрвөн эгнээтэй, 1м өргөн явган зам, 1.5м өргөн дугуйн замтайгаар бүтээн болгожээ. Мөн Шаргаморьтын уулзвараас Хандгайт хүртэлх 6.75 км-т авто замын зорчих хэсгийг 7м өргөн хоёр эгнээтэй, 1м өргөн явган зам, 2м өргөн дугуйн замтайгаар тус тус өргөтгөн шинэчилж, Сэлбэ гол дээр Шаргаморьтын 50 метр урт хуучин төмөрбетон гүүрийг буулгаж, тус бүр 9.5м зорчих хэсэгтэй, 1.5м өргөн явган хүний зам , 2м өргөн дугуйн зам бүхий 50 метр урт хос төмөрбетон гүүрийг шинээр барьж, замын гэрэлтүүлгийг иж бүрэн хийсэн байна. Нийтдээ 16.35км авто замын ажлыг богино хугацаанд хэрэгжүүлэхийн үүднээс тухайн төслийг таван хэсэгт хуваан "Тэгш плант"ХХК, Эрдэнэ зам"ХХК-ийн түншлэл, "Төгс зам"ХХК, "Наранбулаг-Хан"ХХК, "Мотор сервис"ХХК, "Офис сервис"ХХК-ийн замчид ийнхүү зургаан сар орчмын хугацаанд энэбүтээн байгуулалтын ажлыг бүрэн дуусгаж, улсын комисст хүлээлгэн өглөө.