Өчигдөр Налайх дүүргийн нэгдүгээр хороонд бага насны хүүхэд автомашины цонхоор унаж, амиа алдсан харамсалтай хэрэг гарчээ. 

Тодруулбал, тус хороонд оршин суух, 36 настай, эрэгтэй Б гэх иргэн “Hyundai Porter” автомашиндаа гурван настай охиноо үлдээгээд явсан хойгуур охин нь машины цонхоор унасан байжээ. Улмаар эмнэлэгт хүргэгдэх замдаа амьсгал хураасан байна.

Дашрамд дурдахад, ийм тохиолдолд эцэг эхчүүдэд Эрүүгийн хуулийн 118-р зүйл ангиар эрүүгийн хэрэг үүсгэдэг юм байна.

118 дугаар зүйл. Асран хамгаалах үүргээ урвуулах

118.1. Эцэг, эх, асран хамгаалагч, харгалзан дэмжигч хуулиар хүлээсэн асран хамгаалах үүргээ шунахай зорилгоор урвуулан ашигласан, асран хамгаалж байгаа хүнээ хараа хяналтгүй байлгасан, шаардлагатай тусламж үзүүлэлгүй орхисон бол хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах ял шийтгэнэ.