Зорчигч тээврийн нэгтгэлийн Эв нэгдэл үйлдвэрчний эвлэлийнхэн болон тус нэгтгэлийн ажилчид өнөөдөр мэдээлэл хийлээ. Тэд мэдээллийнхээ эхэнд өмнөх зорчигч тээврийн нэгтгэлийн үйлдвэрчний эвлэл нь ажилчдынхаа эрх ашгийг хамгаалсан, үндсэн чиг үүргээ биелүүлж ажилладаггүй байсан учраас нэгтгэлийн ажилчид нэгдэж “Эв нэгдэл” ҮЭХ-г байгуулан, даргаар нь Ц.Ариунбаатарыг томилсон гэдгээ мэдээлсэн.

Шинэ үйлдвэрчний эвлэлийн холбоог байгуулахад Зорчигч тээврийн нэгтгэл ОНӨААТҮГ-ын 1590 ажилтнаас 1274 ажилтан буюу нийт ажилчдын 92 хувь нь гишүүнээр элсэж, батламжаа гардан авсан гэдгийг хэвлэлийн хурал зохион байгуулагчид онцолж байсан. Түүнчлэн Эв нэгдэл үйлдэрчний эвлэлийн хорооны тэргүүлэгчид нэгтгэлийн захиргаатай Хамтын гэрээг байгуулсан нь ажилчдын эрх ашгийг хамгаалсан тэдний ажиллаж, хөдөлмөрлөх боломжийг илүү хангасан гэрээ байгуулагдсан гэдгийг ч хэлж байлаа. Мөн нэгтгэлийн ажилчид Үйлдвэрчний эвлэлээрээ дамжуулан дээд шатны байгууллагатайгаа хамтын гэрээ хэлэлцээр байгуулж, хөнгөлөлт тусламж дэмжлэгийг авах боломжийг бүрдүүлсэн хууль ёсны байгууллага болж чадлаа хэмээн олзуурхаж байгаагаа нуугаагүй. Эв нэгдэл үйлдвэрчний эвлэл нь 28 тэргүүлэгч, хяналтын хорооны 11 гишүүнтэй аж.

Эв нэгдэл үйлдвэрчний эвлэлийн холбооны тэргүүн Ц.Ариунбаатар “Манай зорчигч тээврийн нэгтгэл нь гурван баазтай. Өмнө нь гурван бааз тус бүртээ үйлдвэрчний эвлэлийн байгууллагатай байсан. Харин энэ байгууллагууд ажилчдын эрх ашгаас илүүтэй удирдлагуудтайгаа маргааны түвшинд ажилладаг байсан. Тиймээс гишүүд эвлэлдэн нэгдэж, түр хороо байгуулан улмаар нэг үйлдвэрчний эвлэлийн байгууллагатай болж эрх ашгаа хамгаалуулах ёстой гэдэгт санал нэгдэж, “Эв нэгдэл” үйлдвэрчний хороог байгуулсан. Одоо үйл ажиллагаагаа хэвийн үргэлжлүүлж байна” гэсэн юм.    

Тэгвэл өмнөх үйлдвэрчний эвлэлийн хорооны дарга П.Баттулга нь хэд хэдэн сарын цалингаа аваагүй, хохирч байгаа талаарх мэдээлэл гарч байсан. Харин нэгтгэлийн зүгээр дээрх мэдээллийг үгүйсгэж, П.Баттулгыг сардаа 1 сая гаруй төгрөгийн цалинтай жолоочийн ажлаа хийж байгаа гэдгийг тодотгон хэлсэн. Энэ талаар Зорчигч тээврийн нэгтгэлийн нягтлан бодогч “Гуравдугаар баазын гуравдугаар хэсгийн жолооч П.Баттулга нь 2009 оны зургадугаар сард анх нэгтгэлд ажилд орж байсан. Харин 2015 оны 4 сарын 3-ны өдрөөс ҮЭ-ийн хорооны сонгуульт ажлыг хүлээж аваад зургаадугаар сард сонгуульт ажлаа хийхээр өөрийн хүсэлтээр ажлаас чөлөөлөгдсөн байдаг. Улмаар 2015 оны 10 дугаар сарын 5-ны өдөр автобусны жолоочоор ажилд орох хүсэлтээ гаргаснаар дахин тушаал гарч, жолооч болсон. Үүнээс хойш автобусныхаа жолоочоор ажиллаж байгаа. Энэ хугацаанд түүнд ямар нэгэн шахалт дарамт, эдийн засгийн хувьд хохироосон зүйл байхгүй. Цалин хөлсний тухайд ҮЭ-ийн хорооны ажлаа хийхээр үндсэн ажлаасаа чөлөөлөгдсөн хугацаанд үндсэн цалин олгогдоогүй. Энэ нь байгууллагаас шалтгаалсан зүйл биш. Тэр хүний сонголт байсан. Харин байгууллагад дахин жолоочоор ажилд орох хүсэлтээ гаргаж, ажилдаа орсноос хойших цалин бүрэн олгогдсон. Түүний дундаж цалин 1 сая 100 мянга гаруй төгрөг” гэсэн юм.

Б.Энхжин