Олон улсын Хүүхдийн эрхийг хамгаалах өдөр өнөөдөр тохиож байна. Хүүхдийн баяраар Д.Сүхбаатарын талбайд 15 төрлийн 3000 гаруй Монголын уламжлалт тоглоом наадгайг хүүхэд багачууд, эцэг эхчүүдэд танилцуулж, урлаг соёл, худалдаа, үзвэр үйлчилгээний олон арга хэмжээ зохион байгуулагдана.

Энэ үеэр хүүхэд багачууд, эцэг эхчүүдийн аюулгүй байдлыг хангах, баяраа тэмдэглэх нөхцөл бололцоогоор хангахын тулд Сүхбаатарын талбайн баруун болон зүүн хэсгийн автозамын хөдөлгөөнийг тухайн өдрийн 11.00-16.00 цагийн хооронд түр хугацаагаар хязгаарлах юм.

Бяцхан хүүхэд багачуудын оролцсон явган парад болох үеэр Ерөнхий сайд Амарын гудамж буюу Соёлын төв өргөөний хойд талын автозамыг түр хугацаагаар хязгаарлана.

Мөн Сүхбаатар дүүргийн хэмжээнд Олон Улсын хүүхдийн эрхийг хамгаалах өдрийг 2017 оны 6 дугаар сарын 01-ний өдөр 4-р хорооны нутаг дэвсгэр Б.Цэрэндоржийн гудамж буюу хүмүүсийн хэлж заншсанаар Улсын их дэлгүүрийн урд талын усан оргилуур орчимд тэмдэглэн өнгөрүүлэх гэж байна.

Энэ үеэр Б.Цэрэндоржийн гудамжны баруун зүүн талын 1 чигийн хөдөлгөөнтэй замын зорчих хэсгийг тухайн өдрийн 10:00-18:00 цагийн хооронд түр хязгаарлахаар болсон байна.

Иймд жолооч та дээрх чиглэлээс бусад замыг сонгон хөдөлгөөнд оролцоорой.