Нийслэлийн мэргэжлийн хяналтын газрынхан хүний биед сөрөг нөлөөтэй кофе худалдаалах гэж байсныг таслан зогсоосон байна. Хонконгийн “Golden future trading” компаниас импортолсон “Brazil green Arabica”, “Indonesia green Arabica” гэх хоёр нэр төрлийн 475 кг кофены буурцганд нийслэлийн МХГ-ынхан шинжилгээ хийгээд хүний биед сөрөг нөлөө үзүүлэхүйц бодис байсныг илрүүлжээ.
Тодруулбал, “Brazil green arabica” кофены буурцганд нийлбэр афлатоксин 25.2 мкг/ кг буюу стандартын шаардлагаас зургаа, “Indonesia green arabica” кофенд 36.4 мкг/кг буюу ес дахин их байсан гэнэ. Улмаар давтан шинжилгээ хийхэд эл бодис стандартын шаардлагаас 10-19 дахин их агуулагдаж байжээ.
Тиймээс улсын байцаагчийн дүгнэлтээр 7.4 сая төгрөгийн өртөг бүхий кофены буурцгийг худалдаанд нийлүүлэхээс нь өмнө хураан авч, устгасан байна.
Афлатоксин гэдэг нь хөгц, мөөгөнцрөөс ялгардаг, бодисын солилцооны хоёрдогч химийн бүтээгдэхүүн гэнэ. Байгальд өргөн тархсан бөгөөд хадгалалтын явцад хүнсний бүтээгдэхүүнийг бохирдуулдаг аж.
Эл бодисыг бага хэмжээгээр агуулсан хүнсийг удаан хугацаагаар тогтмол хэрэглэвэл элэгний хатуурал болон хорт хавдар үүсгэх эрсдэлтэй учир 1993 онд Олон улсын хавдар судлалын нийгэмлэгээс хавдар үүсгэгч хүчин зүйлүүдийн I ангилалд оруулсан гэнэ. Уг зөрчил Монгол Улсад бүртгэгдэж буй кофенд илэрсэн анхны тохиолдол аж.
Сэтгэгдэл (3)