Баянгол дүүргийн эрүүгийн хэргийн анхан шатны шүүхээс авлига, хээл хахуулийн хэрэгт холбогдсон гаалийн байцаагч нарт 1-6 жилийн ял оноожээ.

Гааль татварын ерөнхий газрын Замын Үүд суман дахь Гаалийн байцаагч нарт холбогдох авлига, хээл хахуулийн гэмт хэрэгт холбогдсон 36 хүнд холбогдох шүүх хуралдаан өнгөрсөн сарын 31-ний өдөр эхэлж энэ сарын 2, 5, 6-ны өдрүүдэд хуралдаж эцэслэн шийдвэрлэсэн юм. Хэргийг сануулахад, АТГ-ын албан хаагчид 2016 оны гуравдугаар сарын 30-ны өдөр Дорноговь аймгийн Замын-Үүд суман дахь Гааль, татварын ерөнхий газрын нэр бүхий гаалийн улсын болон ахлах байцаагч нарыг албан үүрэг гүйцэтгэх явцдаа бусдаас хээл хахууль авч байхад нь баривчлан саатуулсан юм.

Тэднийг гаалийн бүрдүүлэлт хийсэн автомашинуудад хяналт шалгалтыг зохих ёсоор хийлгүй хурдан хугацаанд саадгүй гаргах, мөн татварын хувь хэмжээг бууруулахаар амлан БНХАУ-аас Замын-Үүд дэх гаалийн газрын хяналтын талбайд орж ирсэн автомашинуудад ачигдсан бараанд төлөгдвөл зохих татварын мөнгийг бүрэн төлүүлэлгүйгээр гаргаж, бусдаас удаа дараа хээл хахууль авсан хэргээр шүүсэн юм.

Хэрэгт холбогдсон 36 хүний найм нь гаалийн байцаагч бөгөөд шүүхээс:

1.Гаалийн байцаагч Б.Ө-д яллах дүгнэлт үйлдэж ирүүлснийг хэрэгсэхгүй болгож цагаатгасан,

2.Гаалийн байцаагч Б.Ц-ээс 3 сая төгрөгийг эд хөрөнгө хурааж, 6 жил 6 сарын хорих ялаар,

3.Гаалийн байцаагч Т.М-ээс 3 сая төгрөгийн эд хөрөнгө хурааж, 6 жил 6 сарын хорих ял

4. Гаалийн байцаагч И.Н-ээс 3 сая төгрөгийн эд хөрөнгө хурааж, 6 жилийн хорих ялаар,

5.Гаалийн байцаагч М.Э-д 1 сая төгрөгийг эд хөрөнгө хурааж, 5 жил 1 сарын хорих ял,

6.Гаалийн байцаагч Б.О-т нэмж нэгтгэн 3 сая төгрөгийг эд хөрөнгө хурааж, гаалийн улсын байцаагчаар ажиллах эрхийг хоёр жил хасаж 6 жил 6 сарын хорих ял,

7.Гаалийн байцаагч Н.Б-д 1 сая төгрөгийн эд хөрөнгө хурааж, 5 жил 1 сарын хорих ял

8.Гаалийн байцаагч Д.Н-т гаалийн улсын байцаагчаар ажиллах эрхийг нэг жил хасаж, 2 жил 6 сарын хорих ял оногдуулж уг ялыг тэнсэж 1 жилийн хугацаагаар хянан харгалзсан байна.