Нийслэлийн Эрүүгийн хэргийн давж заалдах шатны шүүхэд Г.Дэнзэн нарт холбогдох хэргийн шүүх хурал болж байна. Тус хуралдаанд илтгэгч шүүгчээр М.Пүрэвсүрэн, прокурор Н.Бадамцэцэг болон шүүгдэгчийн өмгөөлөгчид оролцож буй юм. Гэвч тус шүүх хуралд Г.Дэнзэнгийн өмгөөлөгчийг оролцуулсангүй.

Уг нь Монгол Улсын иргэн бүр хуулийн өмнө тэгш эрхтэй байдаг. Энэ эрхийнхээ дагуу өөрийгөө өмгөөлж, өмгөөлүүлэх нь эрх нь нээлттэй. Гэвч яаравчлан хийж буй тус шүүх хуралд Г.Дэнзэнгийн өмгөөлөгчийг нь оролцуулалгүй эрхийг нь зөрчиж байгаа нь Ерөнхийлөгч Ц.Элбэгдорж Г.Дэнзэн нарыг яллахаар яаравчлав уу гэх хардлага төрүүлж байна. Сайтар найруулсан энэ “жүжиг”-т Ерөнхийлөгч Ц.Элбэгдоржийг хамаатай хэмээн өнгөрсөн жилүүдэд тааварласаар ирсэн. Учир нь түүнийг хууль хяналтынхныг гартаа атгаж, “дургүй хүргэсэн” хэнбугайг ч шүүхээр оруулж байна хэмээн олон хүн харддаг. Г.Дэнзэн нарыг яллаад байгаа зохиомол хэргийг ч түүний “найруулсан жүжиг” гэдэг бөгөөд Ерөнхий сайд асан Н.Алтанхуяг “Хуйвалдааны төрийг үндэслэгч” хэмээн цоллосон удаатай.

Улмаар хоёр сарын өмнө Г.Дэнзэн нарт холбогдох хэрэгт Чингэлтэй дүүргийн анхан шатны шүүх Г.Дэнзэнд 3.6 жилийн хорих ял, Я.Батсуурьт 2 жилийн хорих ялыг жирийн дэглэмтэй хорих ангид эдлүүлэхээр шийдвэрлэсэн. Харин шүүгдэгч, Г.Түмэнхүү, Т.Төгсбаяр нарт хоёр жилийн тэнсэн харгалзах ял, шүүгдэгч Д.Баярмаад мөнгөн торгууль ноогдуулах шийдвэр гаргасан юм. Мөн шүүгдэгч нараас 5.5 тэрбум төгрөгийг нөхөн төлүүлэх шийдвэр гаргасан.

Тэгвэл энэ хэргийн давж заалдах шатны шүүх хурал өнөөдөр Нийслэлийн Эрүүгийн хэргийн давж заалдах шатны шүүхэд өмгөөлөгчгүйгээр болж байна. Өөрөөр хэлбэл давж заалдах шатны шүүх хурал нэртэй Г.Дэнзэн нарын ялыг эцэслэх Ерөнхийлөгч Ц.Элбэгдоржийн  захиалгат үйл ажиллагаа байж магадгүй байна. Учир нь Ц.Элбэгдорж хэдхэн хоногийн дараа албаа өгнө. Тиймээс Ерөнхийлөгчийн суудалд байгаа дээрээ “зохиолынхоо төгсгөл”-ийг хийхээр улайрч буйг ч үгүйсгэх аргагүй юм. Эх сурвалжийн мэдээлж байгаагаар шүүх хурлыг өнөөдөртөө багтааж дуусгах бөгөөд Г.Дэнзэн нарт оноосон ялыг хэвээр үлдээх магадлал өндөр байгаа аж.