“Тэнгэрт диваажин, газарт Ханжоу” гэсэн алдартай үг бий. Хөгжил цэцэглэлт, ололт амжилтаараа тэргүүлж буй газрын диваажин болсон Ханжоу хотод сэтгүүлчдийн баг аялалынхаа гуравдахь өдрөө морилон саатав. Торго, цайгаараа алдартай Ханжоу хотод алдарт Алибаба, БНХАУ-ын инновацийн төв хотхон, Мөрөөдөл хотхон гээд дэлхийд тэргүүлдэг олон байгууллага, аж ахуй нэгж оршино.  

Мянга сонсохоор нэг нэг үз гэсэн үг бий. Алдарт Алибабагийн тухай сонин, сэтгүүл, телевиз, радио, цахим ертөнцөөс л мэдээлэл авч байснаас өөрийн биеэр очиж үзэж байсан удаагүй. Тэгвэл энэ удаа бидэнд Ханжоу хотод зочилж, Алибаба группээр морилон саатах боломжийг зохион байгуулагчид олгосон юм.

Газрын диваажин Ханжоугийн гялалзах од нь болсон алдарт Алибабагаар зочилсон тэмдэглэлээ энэ удаа хүргэе. Англи хэлний мэдлэгээ дээшлүүлэхийн тулд гадаадын жуулчдад хөтөч хийдэг байсан Жэк Ма “Алибаба” группээ 1999 онд байгуулжээ. Монголын сэтгүүлчид Ханжоу хотын төвд орших “Алибаба” группийн төв оффист зочлоход хамгийн түрүүнд ханан дээрх эртний Хятадын гөүхуа зургийн аргаар зурсан Жэк Магийн хэсэг нөхдийн хамт авахуулсан зураг өөрийн эрхгүй анхаарал татаж байв.

Энэхүү зургийн талаар тус группын менежер ““Алибаба”-г үүсгэн байгуулагч Жэк Ма Ханжоуд ирэхээсээ өмнө Хятадын цагаан хэрмийн дэргэд хэсэг нөхдийн хамт авахуулсан зураг. Тэрбээр алдарт Алибаба группээ үүсгэн байгуулах санаагаа олоод ажил үйлсээ даатгахаар цагаан хэрэм дээр ирээд байхдаа энэ зургийг татуулж байсан” гэдгийг тайлбарласан юм.  

Жэк Магийн өнөөдрийн энэ өндөрлөгт хүрэх зам тийм ч дардан байгаагүй гэнэ. Тэрбээр Хятадын жирийн хороолол дунд, зай талбай багатай өрөөнд хэсэг нөхдийн хамт “Алибаба”-ийн түүхийг эхэлж байсан байна. Энэ бүхнийг өгүүлэх гэрэл зургууд ч “Алибаба”-ийн төв оффист хүндтэй байрыг эзэлжээ.

Алибаба групп 2014 оны есдүгээр сарын 19-нд Нью-Йоркийн Хөрөнгийн биржид хувьцаагаа гаргаж, эхний өдрийн арилжаа нь 230 тэрбум ам.долларт хүрч байжээ. Ийнхүү ажлын гараагаа амжилттай эхлүүлсэн тус групп жил бүрийн арваннэгдүгээр сарын 11-ний өдрийг тив тивийн сая сая хэрэглэгчидийн тэсэн ядан хүлээдэг өдөр болгож чадсан байна. Тодруулбал эл өдөр дэлхийн цахим худалдааны их наадам болж, мянган мянган хэрэглэгч хүссэн худалдаагаа хийдэг байна. “Алибаба” групп 2016 оны яг энэ өдөр болсон дэлхийн цахим худалдааны их наадмын үеэр нэг өдөрт 120 тэрбум юанийн орлоготой ажиллаж байжээ.

Тус группээс гаргасан мэдээллээр энэ их наадамд нийт 235 орон, бүс нутгийн хэрэглэгчид, бизнесмэнүүд оролцдог юм байна. Өөрөөр хэлбэл Жэк Ма бага залуудаа жирийн нэгэн хөтөч байсан бол өдгөө дэлхийн цахим ертөнц дэх Торгоны замын гол хөтчийн нэг болж, газрын диваажин Ханжоугийн гялалзах од нь болсон байна. "Алибаба” группээс гаргасан мэдээллээр, лав л Оросоос 250 мянган бүсгүй өдөр бүр цахим худалдаагаар байнга үйлчлүүлдэг юм билээ. Харин Алибаба худалдан авагчдын бараа бүтээгдэхүүнийг Хятад дотроо 24 цаг, дэлхийн бусад оронд 72 цагийн дотор хүргэх бүрэн боломжтой гэдгийг тус группын менежер бидэнд дуулгаж байсан. Энэ ч утгаараа Алибаба группийн Ханжоугийн хөгжил цэцэглэлтэд оруулах хувь нэмэр асар их байдаг байна.

Үргэлжлэл бий. 

Б.Батчимэг