2017 оны эхний зургаан сарын байдлаар Монгол Улсаас 148 гадаадын иргэнийг албадан гаргаад байна.  Монгол Улсаас албадан гаргагдсан гадаад иргэдийн 47.2 хувь нь Монгол Улсад оршин суух зөвшөөрлийн хугацаагаа хэтрүүлсэн, 27.7 хувь нь эрх бүхий байгууллагын зөвшөөрөлгүй хууль бусаар хөдөлмөр эрхэлсэн, ирсэн зорилгоосоо өөр үйл ажиллагаа явуулсан, 12.8 хувь нь Монгол Улсад байх визийн хугацаа хэтрүүлсэн, 6.7 хув нь виз, бүртгэлийн журмыг жилд 2 удаа зөрчиж, Гадаадын иргэний эрх зүйн байдлын тухай хуульд заасан хариуцлага хүлээсэн зэрэг зөрчил гаргасан бол 5.4 хувийг бусад зөрчлүүд эзэлж байна. 

Албадан гаргасан гадаадын иргэдийн 54 хувийг БНХАУ, 15.5 хувь нь БНАСАУ, 6 хув нь БНСВУ, 4.7 хувийг ОХУ, 19.5 хувийг бусад улсын иргэд эзэлж байгаа аж.

Сүүлийн 3 жилийн байдлаар Монгол Улсаас албадан гаргагдсан гадаадын иргэдийг эхний хагас жилийн тоон үзүүлэлтээр харьцуулбал 2015 онд 18 орны 188 иргэнийг, 2016 онд 25 орны 313 иргэнийг тус тус албадан гаргажээ. Харин 2017 оны эхний хагас жилд 148 гадаадын иргэнийг албадан гаргасан байна.

2017 оны эхний хагас жилд албадан гаргасан гадаадын иргэдийн тоог 2015 оны мөн үетэй харьцуулахад 27 хувиар, 2016 оны мөн үетэй харьцуулахад 111.4 хувиар тус тус буурсан байна.

Ийнхүү буурах болсон шалтгаан нь гадаадын хөрөнгө оруулалт буурсан, эдийн засгийн нөхцөл байдал хүндэрсэнтэй холбоотойгоор гадаадын иргэдийн Монгол Улсад зорчих хөдөлгөөн багассанаас гадна сүүлийн үед хил дээрх хяналт шалгалт сайжирч зөрчилтэй иргэдийг хил дээрээс буцаах, хяналт шалгалт явуулж, иргэдэд хууль эрх зүйн зөвлөгөө мэдээлэл өгөх, аливаа зөрчлөөс урьдчилан сэргийлэх ажлыг тогтмол зохион байгуулж буйтай холбоотой аж. Түүнчлэн хууль эрх зүйн орчин сайжирч, гадаадын иргэдийн Монгол Улсын хууль тогтоомжийг дагаж мөрдөх ухамсар дээшилсэнтэй холбоотой юм.