Улсын онцгой комиссын ажлын хэсэг Сүхбаатар аймгийн Мөнххаан, Баруун-Урт, Асгат, Дарьганга, Эрдэнэцагаан сум, Бичигт олон улсын худалдааны боомтонд ажиллаж, аймгийн Онцгой комиссыг хуралдуулсан байна.
Тус аймагт мал, амьтны гоц халдварт өвчин энэ оны 01 дүгээр сарын 24-нд гарч, улмаар 04 дүгээр сард хорио цээрийн дэглэмийг цуцалсан. Гэвч Дарьганга, Түвшинширээ суманд вакцин тарьсан малаас дахиж өвчний сэжигтэй тохиолдол илэрсэн. Түвшинширээ суманд хорио цээрийн дэглэм үргэлжиж байна. Уг өвчнөөр нийт 9 сумын 28 голомтод 2932 мал өвчний ил шинж тэмдэгтэйгээр өвчилснөөс 2800 малыг зориудаар устгасан байна.
Аймгийн Хүнс, хөдөө аж ахуйн газрын мэдээлж байгаагаар нийт 2,7 сая малыг вакцинжуулсан нь 96,7 хувьтай байна. Аймгийн Засаг даргын нөөц хөрөнгөөс шүлхий өвчинтэй тэмцэхэд 176 сая төгрөг зарцуулжээ.
Сүхбаатар аймагт Засгийн газрын 2016 оны 163, 2017 оны 08, 55, 56 дугаар тогтоолоор хуваарилсан нийт 238,6 сая төгрөгийн өвс, тэжээл, 4 автомашин, малын эм биобэлдмэл, мөнгөн хөрөнгийг зориулалтын дагуу зарцуулж, хяналт тавьж ажилласан аж.
Мөн хээрийн түймрээс урьдчилан сэргийлэх ажлын хүрээнд төрийн байгууллагууд, хуулийн этгээдийн бэлэн байдлыг хангуулж, Засаг даргын нэрэмжит үзлэг, шалгалтыг явуулж, сургалт зохион байгуулав. Онцгой байдлын ерөнхий газраас ирүүлсэн 70 ширхэг үлээгч аппарат, Шилийн гол аймгийн Ойн шугуйн албанаас өгсөн 20 ширхэг аппаратыг нөөцөд нийлүүлсэн. Масс мессежээр 3700 хүнд сэрэмжлүүлэг мэдээлэл хүргэж, нүүрсний болон ашигт малтмалын уурхайнуудад түймрээс хамгаалах шороон даланг босгуулах ажлыг хийлгүүлж, хяналт тавин ажиллаж байна. Аймгийн хэмжээнд нийт 16 бүлэг, 150 албан хаагч, 13 автомашиныг томилгоожуулжээ.
Тус аймагт 1,3 сая хээлтэгч мал байдгаас одоогийн байдлаар 82,3 хувь буюу 1,1 сая хээлтэгч төллөж 1,1 сая төл бойжиж байна. Нийт нутгаар зуншлага хэвийн байна.
Улсын онцгой комиссын Ажлын хэсэг иргэдээс ирүүлсэн гомдлын дагуу 6 дугаар сарын 6-7-ны өдрүүдэд Сүхбаатар аймгийн Эрдэнэцагаан суманд байрлах Бичигт авто замын шалган нэвтрүүлэх боомтод очиж, хилээр өвс экспортолж буй үйл ажиллагаатай танилцав.
Шилийн гол аймагт ажиллах үеэр Улсын онцгой комиссын нарийн бичгийн дарга, хурандаа М.Энх-Амар, Сүхбаатар аймгийн Онцгой байдлын газрын дарга, хурандаа Т.Энхбаатар нар Эрдэнэцагаан сум дахь Гал түймэр унтраах, аврах 47 дугаар ангийн барилга байгууламжийг барих санхүүгийн асуудлыг шийдвэрлүүлэх асуудлаар Шилийн гол аймгийн Зүүн үзэмчин хошууны орлогч дарга н.Алтансүх, Ойн шугуйн албаны дарга н.Баатар нартай уулзав.
БНХАУ-ын зүгээс, Гал түймэр унтраах, аврах ангийн барилгыг барих, бараа, материал, техник, тоног төхөөрөмжийн тусламж үзүүлэх боломжтойгоо илэрхийлсэн байна.
Аймгийн Онцгой комиссоос мал, амьтны гоц халдварт өвчинтэй тэмцэх зардалд шаардагдах нийт 2,0 тэрбум гаруй төгрөг, Дарьганга сумын Засаг даргын тамгын газарт 1 автомашин, Эрдэнэцагаан суманд тохиолдсон хүчтэй шуурганы улмаас орон гэргүй болсон 5 өрхөд улсын нөөцөөс 5 гэр олгох, Эрдэнэцагаан сумын Засаг даргын тамгын газрын автомашины гүйлтийн норм дууссан тул гамшгийн үед дайчлагдан ажиллуулах, иргэдэд төрийн үйлчилгээг шуурхай хүргэх зорилгоор 1 фургон автомашин олгох, Хилийн цэргийн 0146 дугаар ангиас шүлхийн үеэр постод хэрэглэхээр аваад дахин ашиглах боломжгүй болсон 14х6 хэмжээтэй майхны зардлын асуудлыг шийдвэрлэх хүсэлтийг Улсын онцгой комисст тавьсан байна гэж Онцгой байдлын ерөнхий газраас мэдээллээ.
