Монголбанк,“Тэнхлэг зууч” компанитай хамтран 2017 оны 5 дугаар сарын “Орон сууцны үнийн индекс”-ийг танилцууллаа. Энэхүү тооцоо, судалгаанд тухайн сард зах зээлд нийлүүлэгдсэн шинэ, хуучин 4,928 орон сууцны мэдээллийг хамруулсан байна. 

Тавдугаар сард Орон сууцны үнийн ерөнхий индекс 0,99 болж суурь үе буюу 2013 оны 1-р сараас 1,44%-иар буурчээ. Энэ нь өмнөх сараас 2,65 хувиар, өнгөрсөн оны мөн үетэй буюу 2016 оны 5-р сарын үр дүнтэй харьцуулахад 4,72 хувиар буурсан байна.

Мөн өнгөрсөн сарын үзүүлэлтээр шинэ орон сууцны 1м.кв дундаж үнэ  2 сая 16 мянган төгрөг болсон нь өмнөх сараас 0.63 хувиар, өмнөх оны мөн үеэс 1.15 хувиар буурчээ. Сүхбаатар дүүрэгт шинэ орон сууцны 1м.кв-ийн дундаж үнэ хамгийн өндөр байгаа бол Сонгино хайрхан дүүрэгт хамгийн бага байна.

Харин хуучин 2 өрөө байрны дундаж үнэ нь өнгөрсөн сард 72 сая 706 мянган төгрөг болж өмнөх оны мөн үеэс 8.97 хувиар буурсан үзүүлэлт гарчээ. Сүхбаатар дүүрэгт хуучин 2 өрөө байрны дундаж үнэ хамгийн өндөр байгаа бол Сонгино хайрхан дүүрэгт хамгийн бага байна.