Үүлэнд зориудаар нөлөөлж бороо оруулахаар болсон талаарх мэдээллийг бид хүргэсэн. Учир нь хэт халалтаас үүдэн хаврын тариалалт удааширч, жимс жимсгэнийн тариалалтад ч мөн хуурайшилт сөргөөр нөлөөлж байгааг судлаачид онцолсон. Түүнчлэн энэ сард хоёрдугаар арав хоногийн дунд үеэс эхлэн өдөртөө 30-35 хэм хүртэл халах төлөвтэй байгаа.

Тиймээс тариалалтыг удаашруулахгүйн тулд үүлэнд зориудаар нөлөөлж бороо оруулах арга хэмжээ авахаар болсон. Харамсалтай нь үүл буудах пуужингийн нөөц дуусч байгаа талаар Цаг уур, орчны шинжилгээний газрын Улсын сүлжээ, уур амьсгалын үйлчилгээний хэлтсийн дарга Ч.Пунцагдорж дуулгав. Тэрбээр "Дулааны улирал эхэлсээр хур багатай байсан тул 39 экспедиц, 40 газрын генератор нийт нутгаар хэд хэдэн удаагийн үүл буудах ажиллагаа явуулсан. Үр дүнгээ өгсөн нь ч бий, бүтэл муутай болсон тохиолдлууд ч байна.

Хамгийн сайн үйлчилж үр шимээ өгсөн газар нь газар тариалангийн гол бүс нутаг болох Сэлэнгэ аймгийн хэсэг. Бусад хэсгээр ч гэсэн үр дүнгээ өгсөн. Энэ жил үүл буудахаар нөөцөлсөн байсан 1000 пуужингийн нөөц одоо бараг дуусч байна.  Аюулгүйн нөөцдөө орчихсон явж байна. Энэ янзаараа бол нөөц наадам гэхэд дуусах төлөвтэй байна" гэсэн байна.