“Говь” компанийн агуулах, үйлдвэрийн байранд гал гарч, дээвэр нь шатсан талаар бид мэдээлсэн. Тэгвэл Хан-Уул дүүргийн Цагдаагийн I хэлтсийнхэн хэргийн газарт тасралтгүй 10 цаг үзлэг хийж, галын шалтгааныг урьдчилсан байдлаар тогтоожээ. Тэд барилгын дээврийн баруун хойд талаас гал гарч эхэлсэн агааржуулалтын хоолойд хуримтлагдсан газны хийнээс үүдэлтэй гэж үзсэн байна.

Тодруулбал, тус барилгын дээвэрт засварын ажил хийж байсан ажилчид, борооны дусаал гоождог хэсгийг хар цаасаар давхарлаж, хар лакыг хайлуулахдаа газ ашиглан ил гал гаргасан байжээ. Тэндээс гарсан газны хий нь агааржуулалтын хоолойд хуримтлагдаж, цагийн дараа утаа болон уугиж, гал гарсан байх магадлалтай аж. Гэхдээ Цагдаагийн ерөнхий газрын Мөрдөн байцаах албанаас томилогдсон ажлын хэсэг эцсийн байдлаар галын шалтгааныг тогтоохоор ажиллаж байгаа юм байна.

Хэргийг Хан-Уул дүүргийн Цагдаагийн I хэлтэст шалгаж, гал гарсан объектын дээвэр дээр засвар хийж байсан найман хүнээс байцаалт авч эхэлжээ. Тэд хар лак хайлуулахаар хийн газаар ил гал гаргаснаа хүлээн зөвшөөрсөн байна.