Шударга сонгуулийн төлөө иргэний нийгмийн сүлжээ ТББ-уудын нэгдлийн 100 гаруй ажиглагч Ерөнхийлөгчийн сонгуулийг ажиглажээ.

Ажиглалтынхаа дүнг өнөөдөр олон нийтэд танилцууллаа. Тэд нийслэлийн зургаан дүүргийн 50 хэсгийн хороонд ажиглалт хийсэн байна. Хэсгийн хороодын зохион байгуулалт сайн байсан хэдий ч зарим газар нь дутагдалтай зүйл байжээ. Тухайлбал, санал авах бүхээгний зай хэтэрхий ойр, хөгжлийн бэрхшээлтэй иргэн хэн нэгний тусламжгүйгээр санал авах байр руу орох боломжгүй, саналаа уншуулах төхөөрөмж рүү хяналтын камерын дуранг чиглүүлсэн, саналаа тэмдэглэхгүйгээр саналын хуудсаа уншуулах гэсэн сонгогчид хэсгийн хорооны ажилтан хэн нэгнийг заавал сонгох ёстой гэсэн хууль бус шаардлага тавих зэрэг дутагдал ажиглагдсан байна.

Сонгогчдын хувьд хэсгийн хороогоо мэдэхгүй андуурах, саналаа буруу тэмдэглэх, саналын хуудсаа хавтастай нь уншуулах зэрэг байдал ажиглагджээ. Шударга сонгуулийн төлөө иргэний нийгмийн сүлжээний ажиглагчдын ажиглалт хийсэн 50 хэсгийн хорооны 23 нь техникийн тооллого хийх хэсгийн хороогоор суглагдсан байна.Техникийн тооллого нь дунджаар 3-8 цаг үргэлжилсэн бөгөөд гараар тоолсон дүн нь автомат машиныхаа дүнтэй зөрсөн тохиолдол гараагүй гэдгийг онцоллоо.

Мөн Шударга сонгуулийн төлөө иргэний нийгмийн сүлжээний гишүүн байгууллага болох Глоб интернэшл төв таван телевизийг сонгон сонгуультай холбоотой мэдээ мэдээлэл, сурталчилгааг хуулийн дагуу гаргасан эсэхийг судалжээ. Хамгийн хүртээмжтэй, орон даяар цацагддаг, үзэгчдийн тоо, рейтинг өндөр, зах зээлд дөрвөөс дээш жил оршин тогтносон, нэр дэвшигчтэй хамааралтай зэрэг шалгуураар МҮОНТ, 25 дугаар суваг телевиз, UBS, C1, TV9 телевизийг сонгосон байна. Телевизүүд хуулиар заасан хугацаагаа хэтрүүлсэн тохиолдол их гарснаас гадна сонгогчдын боловсролд зориулсан мэдээ мэдээлэл бага байсан нь ажиглагджээ.