“Хүүхдийн зүрх” төслөөрөө хэдийнэ олны танил болсон “Туул ротари” клубынхэн монголынхоо ирээдүй болсон хүүхэд багачуудын шүдний эрүүл мэндэд анхаарал хандуулж эхэлжээ.
Тус клубээс “Happy smile of children” төсөл хэрэгжүүлж, нийслэлийн хүн ам ихтэй дүүргүүд болон хөдөө орон нутгийн эмнэлгүүдэд 100 гаруй сая төгрөгийн өртөг бүхий тоног төхөөрөмж, багажийг хүлээлгэн өглөө.
Тэгвэл “Туул ротари” клубын хамт олон дээрх төслийн хүрээнд БНСУ-ын 3600 дүүргийн захирагч Моран клубынхэнтэй хамтран “Индранил” эмнэлэгт Хүүхдийи шүдний кабинетийг хүлээлгэн өглөө. Энэхүү үйл ажиллагааны нээлтэд “Туул” ротари клубын Ерөнхийлөгч Х.Балжмаа, дэд ерөнхийлөгч Э.Ганбат, төслийн санаачлагч, 2013-2014 оны Ерөнхийлөгч Т.Мягмарсүрэн болон үе үеийн ерөнхийлөгч, клубын гишүүд, төсөлд хамтран ажиллаж буй БНСУ-ын 3600 дүүргийн захирагч, Мораны ротари клубын ерөнхийлөгч, клубын гишүүд оролцсон юм.
Энэ үеэр “Туул” ротари клубын Ерөнхийлөгч Х.Балжмаа “Шүд эрүүл бол бие эрүүл гэдэг. Тэр дундаа хүүхдийн шүдийг эрүүл байлгах, эмчлэх нь нийгмийн хамгийн чухал асуудлын нэг юм. Туул ротари клубээс энэ асуудлыг шийдвэрлэхэд бага ч гэсэн тус нэмэр болох үүднээс “Happy smile of children” төсөл хэрэгжүүлж эхлээд байна. Бид энэхүү төслөө цаашид улам өргөжүүлэн улсын хэмжээнд олон шүдний эмнэлэгт хүүхэд багачууддаа зориулсан кабинетыг нээж өгөхийн төлөө ажиллах болно” гэлээ.
Харин БНСУ-ын Мораны ротари клубын ерөнхийлөгч Лэй ван сан “Бид өмнө нь Монгол Улсад маш олон төслийг хэрэгжүүлж байсан. Харин энэ удаа хүүхэд багачуудыг сэтгэл дүүрэн инээмсэглэж явахад нь зориулсан төслийг хэрэгжүүлж байгаадаа баяртай байна. Монголын хүүхэд багачуудын дунд шүдний өвчлөл маш их байдагт санаа зовж байдаг. Тиймээс ч энэхүү хүмүүнлэгийн үйл ажиллагааг зохион байгуулж, оролцож байгаадаа баяртай байна. Цаашид Туул ротари клубээс бидэнд ямар нэгэн төсөл хэрэгжүүлэх талаар санал тавибал бид олон улсын ротари клубынхэнтэй холбогдож төслөө улам бүр өргөжүүлэн хөгжүүлэхэд бэлэн байгаа” гэдгийг онцолж байсан юм.
"Индранил" эмнэлгийн хувьд нийслэлчүүддээ 24 цагаар үйлчилдэг шүдний эмнэлэг гэдгээрээ онцлог аж. Тэгвэл тус эмнэлэгт хүүхдийн шүдний кабинетийг хүлээлгэн өгөх үеэр эмнэлгийн үүсгэн байгуулагч Т.Адъяатөмөрөөс баярын сэтгэгдлийг нь сонссон юм. Тэрбээр "Туул ротари клубээс хэрэгжүүлж буй төслийн хүрээнд манай эмнэлгийг сонгон авч энэхүү сайхан кабинетыг хүлээлгэн өгч байгаад маш их баяртай байна. Манай улсын шүдний эмнэлгүүдэд сүүлийн үеийн тоног төхөөрөмжийн дутагдал их байдаг. Харин бидний энэхүү тулгамдсан асуудлыг шийдвэрлэн өгч байгаад баяртай байна. Бид хүүхэд багачуудынхаа шүдний эрүүл мэндийн төлөө ажиллах болно" гэдгийг хэлж байлаа.
Дашрамд өгүүлэхэд "Туул ротари" клуб нь 2004 онд байгуулагдсан бөгөөд "Хүүхдийн зүрх" төслөөрөө олонд танигдсан анхдагч клубуудын нэг юм. Тус клуб “Хүүхдийн зүрх” төслийн хүрээнд зүрхний согогтой 314 хүүхдийг БНСУ-д хагалгаа хийлгэж, эмчлүүлсэн байна.
Б.Энхжин
