Өнгөрсөн онд гурван улсын эдийн засгийн коридор байгуулах төсөл хөтөлбөрт 3 улсын төрийн тэргүүн нар гарын үсэг зурснаар Ази Европыг холбосон транзит тээвэр Монгол улсын газар нутгаар дамжин өнгөрөх боломж бий болж байна. Ингэснээр бид энэ тээвэрт бэлэн байх ёстой. Монгол Улсын Засгийн Газар энэхүү төслийг санхүүжүүлэх зорилгоор Азийн хөгжлийн банктай санхүүжилтийн хэлэлцээр байгуулан ажиллаж байна. Төмөр замын царигийн ялгаатай Замын-Үүд өртөө, шилжүүлэн ачих байгууламжийн хүчин чадлыг нэмэгдүүлэхээр “Бүс нутгийн логистикийн төвийг хөгжүүлэх төсөл” Дорноговь аймгийн Замын-Үүд суманд хэрэгжиж байна. Энэхүү төсөл хэрэгжиж логистикийн төв баригдсанаар Монгол Улсын импорт, экспорт, дамжин өнгөрөх тээврийн хэмжээ нэмэгдэж Монгол Улсын эдийн засагт эерэг нөлөө үзүүлэх чухал ач холбогдолтой юм.
Тус логистик төвийн бүтээн байгуулалтын ажлын явцтай Зам, тээврийн хөгжлийн сайд Д.Ганбат тэргүүтэй салбарын удирдлагууд энэ сард хөдөө орон нутагт албан томилолтоор ажиллах үеэрээ танилцаж үүрэг даалгавар өглөө.
Мөн Монгол Улсын төсвөөс төмөр зам дээгүүр авто тээврийн хэрэгсэл хоёр түвшинд гарах гүүрэн байгууламж, авто зам, цэвэр усны шугам, хамгаалалтын хашаа, холбоон кабель шугам, 10кВ-ийн дэд станц, 110 кВ-ийн өндөр хүчдэлийн дэд станц түүнийг өргөтгөх цахилгаан дамжуулах агаарын шугамуудыг бариад байна.
Төслийн ерөнхий гүйцэтгэгчээр “Хятадын 21 дүгээр товчоо” компани, зөвлөхөөр нь БНСУ-ын Сүсон, Монгол талаас Гео зураглал, NBCC кампаниуд зөвлөх үйлчилгээ үзүүлж байна. Одоогийн байдлаар төмөр замын нарийн өргөн цагирагийн далангийн ажлууд бүрэн хийгдэж дууссан байна. Түүнчлэн чингэлэг болон краны талбайн ажлууд болон барилга байгууламжийн суурийн цутгалтын ажлууд бүрэн хийгджээ. Мөн блок, зуурмагийн үйлдвэр, лаборатори, карьер, чулуу бутлуур ажиллаж байна.
Уг төсөл 40 хувийн гүйцэтгэлтэй байгаа бөгөөд ложистик төвийн гүйцэтгэгч талаас тулгамдаж буй асуудлуудаа салбарын сайдад энэ үеэр уламжилсан. Тус төвийн барилгын ажлын тоо хэмжээнд өөрчлөлт орсноос үүсээд буй асуудлыг Төслийг санхүүжүүлэгч Азийн хөгжлийн банктай Зам, тээврийн хөгжлийн яамны зүгээс ярилцаж энэ асуудлыг шийдвэрлэн графикт хугацаанд нь ашиглалтад оруулахад анхаарч ажиллана. Аливаа бүтээн байгуулалтыг хэрэгжүүлэхдээ эхнээс нь цогцоор нь асуудлыг шийдвэрлэж яваагүйгээс гацаа үүсч, зардал мөнгө өсөх, хугацаа хойшлох зэрэг сөрөг талууд үүсдэг. Бид цаашид энэ тал дээр анхаарч ажиллах ёстой хэмээн салбарын сайд тус төвийн үйл ажиллагаатай танилцах үеэр хэлсэн юм.
Ложистикийн төв байгуулагдсанаар 6 сая гаруй тонн ачааг шилжүүлэн ачих боломж бүрдэнэ. Ирэх онд бүтээн байгуулалтын ажил дуусаж, 2019 онд үйл ажиллагаагаа явуулахаар төлөвлөн ажиллаж байна.
