Тулгар төр байгуулагдсаны 2226, Их Монгол Улс байгуулагдсаны 811, Ардын хувьсгалын 96 жилийн ойн Үндэсний их баяр наадмын мэндийг Төрийн тусгай албан хаагчдын нэгдсэн эмнэлгийн зүгээс наадамчин олон та бүхэндээ өргөн дэвшүүлье.

Төрийн тусгай албан хаагчдын нэгдсэн эмнэлэг нь Монгол Улсын ууган эмнэлгүүдийн нэг бөгөөд анх 1933 онд Дотоодыг хамгаалах газрын эмнэлэг нэртэйгээр голомт сууриа тавьсан билээ.

Түүхэн цаг хугацаанд удаа дараа нэрээ өөрчилж, Цэргийн төв эмнэлэгтэй нэгдэж ирсэн удаатай. Монгол Улсын Засгийн Газрын 2016 оны 08 дугаар сарын 31-ний өдрийн 68 дугаар тогтоолоор Хууль зүй, дотоод хэргийн сайдын эрхлэх асуудлын хүрээнд Төрийн тусгай албан хаагчдын нэгдсэн эмнэлгийг дахин сэргээн байгуулан, 2017 оны 01 дүгээр сараас эхлэн үйл ажиллагаагаа явуулаад хагас жилийн хугацаа өнгөрч байна.

Бид төрийн тусгай албан хаагчид төдийгүй тэднийг гэр бүл, үр хүүхэд, өндөр настан болон Чингэлтэй дүүргийн иргэдэд эрүүл мэндийн тусламж, үйлчилгээг үзүүлж, үйл ажиллагааны цар хүрээгээ тэлсээр байна.

Айл бүхний гишүүн бүр эрүүл энх байж, гал голомт нь бадран гийж, хүн бүрийн хүсэл мөрөөдөл биелэн, хүүхэд бүр аз жаргалтай, настан буурлууд нь сэтгэл тэнэгэр байж Монгол Улс минь бадран хөгжихийн өлзийтэй ерөөлийг уламжилъя. Есөн эрдэнийн гоёлоор баярын жавхааг нэмж Есөн хөлт цагаан тугаа хоймор юугаан залж Есөн цагаан хүслээ цацал болгон өргөж Есөн есөн билэгтэй Монгол түмэн минь дэнж хотойтол Сайхан наадаарай.

Төрийн тусгай албан хаагчдын нэгдсэн эмнэлгийн захирал, дэд хурандаа    Л.Баттөр