Сэлэнгэ аймгийн Ерөө, Мандал сумдад тус бүр 3 түймэр, Хүдэр суманд 2 түймэр, Төв аймгийн Батсүмбэр суманд 4 түймэр, нийтдээ 12 түймэр гарснаас гурван түймрийг цурманд оруулсан, 9 түймэр асч байна. Төв аймагт асч буй дөрвөн түймрийн улмаас Улаанбаатар хот түймрийн утаатай байгаа юм.

Эдгээр түймрийг унтраахаар Онцгой байдлын ерөнхий газрын харьяа Аврах тусгай анги, Нийслэлийн Онцгой байдлын газар, орон нутгийн Онцгой байдлын газруудаас нийт 207 алба хаагч, орон нутгаас 140 иргэн, 29 автомашин, техник хэрэгсэлтэйгээр ажиллаж байгаа ч хүн хүчний асуудал дутмаг байгаа.

Тиймээс Төв аймгийн Батсүмбэр сумын нутаг дэвсгэрт гарсан ойн түймрийг унтараах ажилд туслахаар залуус сайн дураараа нэгдэн замд гарсан. 

Тэдгээр залуус өчигдөр Батсүмбэр суманд очмогцоо Шатан, Бургалтай, Баянгол, Сөгнөгөр гэсэн дөрвөн чиглэлд хуваагдан гал унтараалцаж эхэлсэн байна. Эх орныхоо төлөө ийнхүү нэгдсэн залуустаа сайн сайхныг хүсье.