“Цэцэрлэгийн онлайн бүртгэл”-ийн талаар нийслэлийн Мэдээллийн технологийн газар болон Нийслэлийн Боловсролын газраас өнөөдөр мэдээлэл хийлээ.

Долдугаар сарын 25-ны өдрийн 00:00 цагаас хойш цэцэрлэгийн цахим бүртгэлд 5374 хүүхэд амжилттай бүртгэгдсэн байна. Нийслэлийн хэмжээнд энэ жил цэцэрлэгт шинээр элсэх 35 000 гаруй хүүхэд байгаагаас 12 000 хүүхдийг цэцэрлэгт хамруулах боломжтой байгаа аж.

Нийслэлийн Боловсролын газрын дарга Ж.Гантулга “Иргэд цахим бүртгэл, цахим элсэлт гэсэн хоёр тусдаа зүйл байгааг анхаарах хэрэгтэй” хэмээн мэдэгдсэн бөгөөд цэцэрлэгт шинээр элсэх буюу энэ жил 2 нас хүрч байгаа хүүхэд багачуудыг цахим элсэлтэнд хамруулах бол бүртгэгдэж, хүмүүжиж байсан цэцэрлэгтээ намраас анги дэвшин суралцах хүүхдүүд цахим бүртгэлд хамрагдах юм байна.

2017-2018 оны хичээлийн жилд төрийн өмчийн цэцэрлэгт шинээр элсэж байгаа  хүүхдийн бүртгэл цахим хэлбэрээр 2017 оны долдугаар сарын 25-аас наймдугаар сарын 24-ний хооронд зохион байгуулагдана. Өмнөх хичээлийн жилд цэцэрлэгт хамрагдсан болон тухайн цэцэрлэг 3-5 насны хүүхдийг шинээр элсүүлэн авах бол бүртгэлийг 2017 оны наймдугаар сарын 21-24-ний өдрүүдэд уламжлалт аргаар зохион байгуулах юм.

Тухайн цэцэрлэгийн онцлог, ачаалал зэргийг харгалзан үзсэний дүнд зорилтот бүлгийн хүүхдийн элсэлтийг 20 хүртэл хувиар тооцож нэмж элсүүлж болох ажээ. Харин уг нэмэлт элсэлтийн бүртгэлийг 2017 оны  наймдугаар сарын 21-24-ний өдрүүдэд уламжлалт аргаар тус тус зохион байгуулна хэмээн Нийслэлийн Боловсролын газраас тайлбарлалаа.

Цахим бүртгэлд хамрагдах боломжгүй хүүхдүүдийг наймдугаар сарын 10-наас эхлэн  бүртгэл хийх багш, аргазүйч нар цэцэрлэгүүд дээр ажиллаж бүртгэж авах ажээ. Цэцэрлэгийн хүүхдүүдийн дунд явуулах сугалааны талаар Нийслэлийн Мэдээллийн технологийн газрын дарга О.Чинзориг “Хэрвээ тухайн цэцэрлэг даац хэтэрсэн тохиолдолд сугалаа явагдана. Сугалааг санамсаргүй аргаар зохион байгуулна. Сугалааны үнэн зөв, ил тод явагдах эсэхийг Кибер аюулгүй байдлын газар, ТЕГ-аас тухайн үед нь шалгана” хэмээн мэдэгдсэн юм.

Мөн цахим бүртгэл, цахим элсэлтийн хувьд системийн хувьд гацсан, асуудал гарсан зүйл байхгүй гэдгийг онцлон хэллээ.