Сүхбаатар дүүргийн Засаг даргын Тамгын газар АДРА-Монгол олон улсын байгууллагатай хамтран өрхийн тариалан эрхлэгчдийн хөдөлмөрийн үр шимийг дүгнэх, тариаланчдын шилдэг бүтээгдэхүүн, шинэ ургацын дээжийг хэрэглэгчдэд хүргэх зорилгоор “Ургацын баяр-2018” өдөрлөгийг өнгөрсөн долоо хоногт зохион байгууллаа.

Ургацын баярт дүүргийн өөртөө туслах бүлгийн гишүүд идэвхтэй оролцож, тарьж ургуулсан 1,2 тонн төмс, хүнсний ногоо, 200 гаруй шил даршилсан ногооны борлуулалт хийж, шинэ ногооны салат, ногооны болон жимсний чанамал, амтат жимсээр өдөрлөгт оролцсон иргэдийг дайллаа.

Дүүргийн хүн амын хүнсний хангамжийг сайжруулах зорилтын хүрээнд өрхийн тариалан эрхлэлтийг дэмжин АДРА-Монгол олон улсын байгууллагатай хамтран “Өрхийн тогтвортой тариалан” төслийг 2013 оноос амжилттай хэрэгжүүлж 220 өрхийг төмс, хүнсний ногоо, жимс жимсгэнэ тарьж ургуулах, даршлах, хүлэмжийн аж ахуй эрхлэх аргад сургасан бол энэ жилээс өөртөө туслах бүлгийн системд шилжин Дэвжих, Бэлх байгаль, Мандах дэвших, Ургац, Баян ундарга гэсэн таван бүлэгтэй боллоо.

Дүүргийн хөдөлмөр, халамжийн хэлтэс эдгээр бүлгүүдэд тус бүрт нь нэг га газарт тариалалт хийлгэж, хүлэмж олгон сургалт зохион байгуулж, мэргэжил арга зүйгээр ханган 40-50 тонн төмс, хүнсний ногоо, хүлэмжнээс 4-5 тонн нарийн ногоон хураах зорилготой ажиллаж байна.

Мөн “Адра-Монгол”-оос өрхийн тариалан эрхлэгчдийг зах зээлд гаргах, өрсөлдөх чадварыг нэмэгдүүлэх зорилгоор “Хатаасан ногоо”, “Чийгийн улааны бордоо”, “Эсгий шаахай” төслүүдийг хэрэгжүүлж, бүлгийн гишүүдийн хийсэн бараа, бүтээгдэхүүний үзэсгэлэн худалдааг зохион байгуулсан юм. 

Л.Сайнаа