Чингэлтэй дүүргийн Эрүүл мэндийн төв сүрьеэ болон бусад халдварт өвчний эрт илрүүлгийн оношилгооны төхөөрөмжтэй боллоо.

Тус дүүрэг энэ жилийг “Өрхийн хөгжлийг дэмжих жил” болгон зарласан бөгөөд сүрьеэгийн эрт илрүүлгийг нэмэгдүүлж, иргэдийг эмчилгээ, оношилгоонд бүрэн хамруулах, урьдчилан сэргийлэх зөвлөмж өгөх, сургалт сурталчилгааг эрчимжүүлэх зорилгоор “илрүүл, эмчил, сэргийл”, “Бид өрх бүрт хүрч ажиллана” зорилтот төслийг хэрэгжүүлж эхэлсэн.

Энэ хүрээнд нэн шаардлагатай байгаа 160 сая төгрөгийн өртөг бүхий зөөврийн “Protable X-Ry wireless Detector Mobi Rad50” маркийн дүрслэл оношилгооны тоног төхөөрөмжийг дүүргийн төсвийн хөрөнгөөр худалдан авчээ.

Чингэлтэй дүүргийн эрүүл мэндийн төвийн Төлөвлөлт, хамтын ажиллагаа хариуцсан мэргэжилтэн Б.Уламбаяр “Алслагдсан гэр хороололд аппаратаа аваад өрхийн Эрүүл мэндийн төвүүдэд үзлэг, шинжилгээ хийхэд ашиглах зорилготой зөөврийн рентген дижитал аппарат юм. Манай улсын хувьд сүрьеэгийн тархалтыг Олон Улстай харьцуулахад хамаагүй өндөр байдаг. Энэ нь нийгмийн тулгамдаж буй асуудал учраас эрт илрүүлэг оношилгоо, ялангуяа уушгины дүрс оношилгоо найдвартай шинжилгээнд ордог учраас тодорхой зорилтын хүрээнд уг аппаратыг авч байгаа” гэв.

“Эрүүл мэндийг дэмжих жилийг тохиолдуулан өрхийн орлого доогуур иргэдэд эрт илрүүлэг хийх зорилгоор 12 орчим мянган иргэнийг хамруулаад байна. Үүнээс Чингэлтэй дүүрэг сүрьеэгийн өвчлөлийг эрт илрүүлэх, оношлох зайлшгүй шаардлага байна гэдэг нь харагдсан юм. Тиймээс зорилтынхоо хүрээнд иргэд рүүгээ хандсан нэг ажлын алхам болгон худалдан авалт хийж, зөөврийн оношлуур аппаратыг ашиглалтад оруулахаар боллоо” гэж Чингэлтэй дүүргийн Засаг даргын Тамгын газрын дарга А.Дамцагдорж ярьсан юм.

Б.Лхам