Монгол Улсын Засгийн газрын 2010 оны 172 дугаар тогтоолоор батлагдсан “Түүхэн үйл явдлын ой, тэмдэглэлт өдрийг тэмдэглэх, гавьяат үйлстнийг алдаршуулах, дурсгалыг нь мөнхжүүлэх журам”-ын 4.1. 27 дугаар заалтын дагуу “Соёл, урлагийн ажилтны өдөр”-ийг жил бүрийн есдүгээр сарын хоёр дахь долоо хоногийн “Ням гариг”-т тэмдэглэн өнгөрүүлж ирсэн уламжлалтай.

Энэхүү ажлын хүрээнд аймгийн ЗДТГ, БСУГ-тай хамтран “Соёл, урлагийн ажилтны баярын өдөр”-ийг зохион байгууллаа. Тус арга хэмжээнд аймгийн Засаг даргын орлогч Ч.Сарангэрэл, ЗДТГ-ын НБХ-ийн дарга Д.Мөнхцэцэг, БСУГ-ын дарга У.Даваажав, Өндөрширээт сумын уугуул МУГЖ Н.Батцэцэг нар болон соёл урлагийн салбарын ажилтан, уран бүтээлчид, 26 сумын Соёлын төвийн эрхлэгч нар оролцлоо.

Төв аймгийн хувьд “Соёлын бодлого”-ыг долоон зорилт 52 хэрэгжүүлэх арга хэмжээтэйгээр батлуулан ажиллаж байна. 2018-2019 онд Улсын төсвийн хөрөнгө оруулалтаар Баяндэлгэр, Мөнгөнморьт, Дэлгэрхаан сумдад Соёлын төвийн барилгын ажил хийгдэж байна. Мөн аймгийн “Монгол туургатан” театрын барилгыг шинээр барьж байгаа бөгөөд ажлын явц 95 хувьтай байна. Ирэх 10 дугаар сараас үйл ажиллагаа эхлүүлэх юм.

Арга хэмжээний үеэр соёлын салбараас Монгол улсын “Соёлыг тэргүүний ажилтан” таван, хоёр “Тэргүүний ардын авьяастан” шинээр төрөн гарлаа.