Сүхбаатар аймгийн хэмжээнд өнөөдрөөс эхлэн өндөржүүлсэн бэлэн байдлын зэрэгт шилжжээ. Учир нь Онцгой байдлын ерөнхий газраас гамшгаас хамгаалах иж бүрэн сургуулийг Сүхбаатар аймагт энэ сарын 25-27-ны өдрүүдэд зохион байгуулахаар бэлтгэл ажлыг ханган ажиллаж байгаа аж. Гамшгаас хамгаалах иж бүрэн сургууль зохион байгуулахтай холбогдуулан тус аймгийн Онцгой комисс, гамшгаас хамгаалах орон нутгийн алба, мэргэжлийн анги, аж ахуй нэгж, байгууллага, сайн дурын хэсгүүд өндөржүүлсэн бэлэн байдлын зэрэгт шилжсэн нь энэ юм байна.
Тус сургуулийн зорилго нь аймаг, орон нутгийн удирдлага, онцгой комисс, гамшгаас хамгаалах албад, мэргэжлийн ангиуд тухайн бүс нутагт тохиолдож болзошгүй аюулт үзэгдэл, осол, гамшгийн хор хохирлыг өөрийн хүчээр даван туулах, авран хамгаалах, сэргээн босгох боломж байгаа эсэхээ дүгнэх, гамшгаас хамгаалах орон нутгийн төлөвлөгөөг бодит байдал дээр турших, удирдах бүрэлдэхүүнд гамшигтай тэмцэх чадавхиа дээшлүүлэх мэдлэг, дадлыг эзэмшүүлэх, ард иргэдийг гамшгаас хамгаалах үйл ажиллагаанд татан оролцуулахад чиглэжээ. Сургуулийн үеэр цагийн байдлын дагуу зарлан мэдээллийн дохиогоор ажиллах, гамшгаас хамгаалах хүч хэрэгсэл, бэлэн байдлын төлөвлөгөөг тодотгох, цагийн байдлын дагуу бүлгээр ажиллах, дадлага сургуулиуд зохион байгуулагдах юм. Гамшгаас хамгаалах иж бүрэн сургуулийн удирдагчаар ОБЕГ-ын дэд дарга, хурандаа Б.Ууганбаяр ажиллаж байна
Дашрамд дурдахад, Сүхбаатар аймгийн хэмжээнд 2017 оны хоёрдугаар сард Гамшгаас хамгаалах өндөржүүлсэн бэлэн байдлын зэрэгт шилжиж байсан юм. Тус аймгийн Эрдэнэцагаан, Асгат сумдад малын гоц халдварт шүлхий халдварт өвчин оношлогдож, Баруун-Урт, Сүхбаатар сумдад өвчний шинж тэмдэг илэрч, өвчний тархалт нэмэгдэх хандлагатай байсан тул өндөржүүлсэн бэлэн байдлын зэрэгт шилжиж байв.
