ЗТХЯ-нд гарсан хүн амины хэргийн хохирогч Т.Гомсүрэнгийн гэр бүл болон өмгөөлөгч өнөөдөр мэдээлэл хийлээ. Өнөөдөр түүнийг хөдөөлүүлснээс хойших 49 хоног болж байна.

Түүний аав Р.Төмөрхуяг “Манай удам угсаа дөрөв дэх үеэ төрд зүтгүүлж байсан сэхээтэн гаралтай гэр бүл юм. Талийгаач бол голомт түших ганц хүү байсан юм. Би нэг хүү хоёр охинтой. Хүүхдүүддээ бүгдэд нь боловсрол эзэмшүүлсэн. Одоо ач нараа боловсролтой хүн болгочих юм сан гэж бодож байна. Хамгийн гол нь ач нартаа 20 жилийн дараа аав нь архи ууж зодоон хийж байгаад өөд болсон гэх үү, ажлаа хийж яваад хүний гарт амиа алдсан гэх үү. Үүний төлөө л тэмцэж, өнөөдөр үнэнийг хэлмээр байна. Төрийн байгууллагад ажиллаж байхад ийм хэрэг явдал болно гэж бодолгүй хүүгээ энэ албанд зүтгүүлсэн. Энэ хугацаанд бид ёс жаягаа бодоод хэргийн талаар юм дуугараагүй. Уг явдлаас хойш хүүг минь архидан согтуурсан, харилцан зодолдож амь насаа алдсан гэх яриа гарсан. Би төрийн албанд 43 жил зүтгэхдээ нэг хундага ч архи ууж байгаагүй. Сэлэнгийн 100 гаруй мянган хүн энэ тухай мэднэ. Мөн хүүгээ архи ууж, танхаа хийдэг болгож хүмүүжүүлээгүй бөгөөд манай удамд ийм хүн байдаггүй юм” гэж ярьж байлаа.

Тухайн өдөр тус яамны гуравдугаар давхарт Б.Махбалын хамт архидан согтуурч байсан хүмүүс зориудаар дуудан ирүүлж, улмаар амь насыг нь хэрцгийгээр хороосон. Үүнийг нотлох талийгаачийн гар утсыг авч ирлээ хэмээн талийгаачийн авга ах Р.Ганхуяг хэллээ.

Тус талийгаачийн гар утсанд хэрэг гарахын өмнөх Б.Махбалын өрөөнд хүрээд ир хэмээх яриатай бичлэг байлаа.

Талийгаачийн албан тушаалыг булаан авахаар 2018 оны хоёрдугаар сараас хойш зохион байгуулалттайгаар хуйвалдаж шат дараалсан ажлуудыг хийж байсныг тэд ярьж байна. Тодруулбал, дөрөвдүгээр сарын 13-ны өдрийн Төрийн албаны зөвлөлийн тогтоол байгаа аж. Энд талийгаачийг томилолтоор явсны хооронд С.Доржготовыг ЗТХЯ-ны Хяналт шинжилгээний үнэлгээ, дотоод аудитын газрын даргын албан тушаалд нэр дэвшүүлэхээр тус яамны Төрийн нарийн бичгийн дарга Ж.Бат-Эрдэнэд санал болгосугай гэсэн баримт тэдэнд байгаа юм.

Түүнчлэн тус яаманд хэрэг гарсны дараа талийгаачийн өрөөнд орж үзэхэд компьютер нь асаалттай хийж байсан ажил, бичиг цаас, гадуур хүрэм, гар утас гээд бүгд ажлын өрөөнд нь байжээ. Өөрөөр хэлбэл, ажлаа хийж байсныг нь нотлох гэрэл зургийг баримтжуулан авчээ.

Өмгөөлөгч З.Хүрэлсүх “Зам тээврийн хөгжлийн яаманд архидан согтуурч байгаад нэгнийхээ амь насанд хүрлээ гэсэн мэдээлэл бичихгүй байхыг хүсч байна. Одоог хүртэл шалгаж байгаа хэргийг тухайн өдрөөс хойш 14 цагийн дараа гарсан үг үсгэнд хөтлөгдөөд байна. Мөн олон нийтийн анхаарлыг архитай холбох тийм ашиг сонирхол хэнд байсан, үүнээс хэн ямар ашиг хонжоо олох вэ гэдэг бодол өмгөөлөгч нарт төрч байгаа. Хэргийн талаар дүгнэж хэлэх эрхтэй субъект бол хуулиараа хэвлэлийн төлөөлөгч биш зөвхөн прокурор байна. Талийгаач бол архинаас хол хүн гэдгийг мөр зэрэгцэн ажиллаж байсан хүний хувьд батлан хэлж байна. Гар утасны дуудлагаас харвал архидаж байсан хэсэг бүлэг хүмүүс эрүүл саруул ажлаа хийж байхад нь өрөөнөөс нь дуудаж гаргаж авсан тухай зүйлийг ар гэрийнхэн нь үзүүллээ. Дуудлагын цагийг одоогоор мэдэхгүй байна. Үүнийг цаашид шалгах газар нь шалгах юм. Энэ нь Эрүүгийнх нь хэрэгт хамааралтай баримт гэж үзэхээс өөр аргагүй байгаа учраас хэргийн материалтай танилцсаны дараа тодорхой болно. Хөдөлшгүй баримт гэж бодож байна. Мөн төрийн албанд ажиллаж байгаа хүнийг хэлмэгдүүлж байгаа ийм хэлмэгдэл гэж хэлэхээс өөр аргагүй байна. Ер нь Засгийн газар солигдсоноор яамны ажилтнууд тэр тусмаа удирдах албаныхан солигддог жишиг явж байна. Үүнд улс төрийн ашиг сонирхол, талцаан, зөрчилдөөнөөс болж төрийн албаны мэргэшсэн хаагчид тогтвортой ажиллаж чаддаггүй байдал лавширсан. Төрийн жинхэнэ удирдах албан тушаалтныг томилох нь хууль бус үйлдэл, эс үйлдэхүйтэй шууд холбоотой байгаа учраас ажлаа хийж явсан мэргэшсэн алба хаагчийн хувьд эрдэнэт амь насыг нь авчихсан ийм хуйвалдааны шинжтэй асуудал яригдаж байна” гэв.

Тус хэргийг анх Сүхбаатар дүүргийн нэгдүгээр хэлтсийн Цагдаагийн газраас шалгажээ. Өнөөдрийн хувьд ЦЕГ-ын Мөрдөн байцаах албаны, Хүнд гэмт хэрэг мөрдөн шалгах хэсэг шалгаж байгаа юм байна.

Дүүргийн болон Нийслэлийн Цагдаагийн газрын мөрдөгч, хяналт тавьж байсан Прокуроруудын үйл ажиллагаа хуульд заагдсан журмын дагуу явагдсан эсэхэд хэргийн материалтай танилцсаны дараа тодорхой болно гэдгийг өмгөөлөгч хэллээ.

                                                                      Б.Лхам