Дэлхийн аялал жуулчлалын өдөр өчигдөр тохиолоо. Энэ өдрийг тохиолдуулан Байгаль орчин, аялал жуулчлалын яамнаас салбарынханд зориулан “Аялал жуулчлал ба цахим хувьсал” сэдэвт семинар зохион байгуулснаас гадна сонсголын бэрхшээлтэй иргэд, ерөнхий боловсролын сургуулийн сурагчдад зориулж сургалт явуулсан юм. Тэднийг хамруулан хотын аялал зохион байгуулав.

Үүнээс гадна аялал жуулчлалын өдрийн хүрээнд Улаанбаатар хотод үйл ажиллагаа явуулж буй олон улсын стандартыг ханган ажиллан ажилладаг зочид буудлуудад од, цэцэг зэргийн батламж гардууллаа. Тодруулбал, “Холидэй инн” зочид буудал таван одны зэрэглэл, “Рамада Улаанбаатар сити центр” дөрвөн одны зэрэглэл, “Роял хаус” зочид буудал дөрвөн одны зэрэглэл, “Хүннү палас” зочид буудал гурван одны зэрэглэл, “Дээдэс” зочид буудал гурван одны зэрэглэл, “Сэлэнгэ” амралт цогцолбор хоёр цэцэг, “Цагаан булаг” жуулчны бааз хоёр цэцэг зэргийг тус тус хангажээ. Энэ үеэр Байгаль орчин, аялал жуулчлалын яамны Аялал жуулчлалын бодлого зохицуулалтын газрын дарга С.Баясгалан “Аялал жуулчлалын салбар сүүлийн жилүүдэд эрчимтэй хөгжиж байна. Энэ оны эхний хагас жилийн байдлаар улсын хэмжээнд олон улсын сүлжээний  болон дотоодын хөрөнгө оруулалттай 517 аж ахуйн нэгж зочид буудлын чиглэлээр үйл ажиллагаа явуулж, 574 жуулчны бааз, ойролцоогоор 55 мянга орчим ажлын байрыг бий болгоод байна. Үүнээс улсын хэмжээнд өнгөрсөн оны байдлаар нийт 1-5 одны зэрэглэлийн шаардлага хангасан 79 зочид буудал, цэцгийн зэрэглэл хангасан 26 жуулчны бааз байна. Энэ онд нийт 12 зочид буудал, жуулчны бааз албан хүсэлт тавьснаас долоон аж ахуйн нэгж зэрэглэлийн шаардлага хангасан” гэв.

Сонирхуулахад, НҮБ-ын Аялал жуулчлалын байгууллагаас энэхүү өдрийг “Аялал жуулчлал Ба цахим хувьсал” уриан дор Унгар Улсын Будапешт хотноо зохион байгуулж, тэмдэглэн өнгөрүүлж байгаа аж. Тус тэмдэглэлт өдрийг Дэлхийн аялал жуулчлалын байгууллагын санаачилгаар 1979 оноос эхлэн тэмдэглэж ирсэн бөгөөд аялал жуулчлалын салбарын ач холбогдол, үр өгөөжийг нийгэм, улс төр, соёл, эдийн засгийн гол салбаруудад таниулах гол зорилготой аж.