“Төрийн байгууллагын хүний Нөөц-Бизнесийн таатай орчныг бүрдүүлэх нь” сэдэвт олон улсын эрдэм шинжилгээний цуврал хурал боллоо.
Хурлыг МУИС-ийн ОУХНУС-ийн Нийтийн Удирдлагын тэнхим, Монгол Улсын Төрийн албаны зөвлөл, ХБНГУ-ын Шпайрын Төрийн захиргаа судлалын институт, ХБНГУ-ын Шпайрын Төрийн удирдлагын их сургууль, ХБНГУ-ын Олон Улсын Хамтын Ажиллагааны Нийгэмлэг (GIZ), АНУ-ын Анкореж дахь Аляскын их сургууль хамтран зохион байгуулсан юм.
Энэ жилийн эрдэм шинжилгээний хуралд ХБНГУ-ын Шпайрын төрийн захиргаа судлалын институтийн захирал, АНУ-ын Анкореж дахь Аляскын их сургуулийн Бизнес, нийтийн удирдлагын сургуулийн Профессор Жон Даффи, Япон улсын Чуо их сургуулийн Профессор Хироко Кудо, Гүрж Улсын Төрийн албаны зөвлөлийн дарга Профессор Кэтрин Кардава, МУИС-ийн ОУХНУС-ийн Нийтийн удирдлагын тэнхимийн эрхлэгч Профессор Н.Бурмаа нар Төрийн Байгууллагын хүний нөөцийн хөгжил, бизнесийн таатай орчин бүрдүүлэх сэдвийн хүрээнд илтгэл хэлэлцүүллээ.
Түүнчлэн энэ үеэр "Нийтийн үйлчилгээний салбар ба бизнесийн таатай орчин - амжилтын хүчин зүйлс", "Нийтийн үйлчилгээний салбарын шинэчлэлтэй холбоотой арга хэмжээ ба анхаарах асуудлууд" салбар хуралдаан боллоо. Тус хуралд UNDP, ХБНГУ-н элчин сайдын яам, Монгол Улсын Төрийн Албаны Зөвлөл, Улаанбаатар хотын дүүргүүд, Санхүүгийн зохицуулах хороо, Гадаадын иргэн, харьяатын газар зэрэг төрийн байгууллагууд, Сэлэнгэ, Увс, Баянхонгор, Өмнөговь, Төв аймгийн засаг даргын тамгын газрын төлөөлөгчид, мөн түүнчлэн МУИС-н бүрэлдэхүүн сургууль, Удирдлагын Академи, БХИС, ХСИС, ШУТИС зэрэг судалгаа шинжилгээ болон олон улсын, төрийн байгууллага, олон нийт төрийн бус байгууллагын 150 гаруй төлөөлөгчид оролцов.
Б.Лхам
