Хамгийн анхын зохиогчийн эрхийн гэрчилгээг 1994 оны тавдугаар сарын 19-ний өдөр олгож байжээ. Энэ нь 01 дугаартай Бүгд Найрамдах Монгол Ард Улсын төрийн дуулал юм.
Монгол улсын төрийн нэгэн бэлгэ тэмдэг болох Монгол улсын төрийн дуулал нь 1950 онд үүсчээ. Үүнээс өмнө төрийн үүрэг бүхий хэд хэдэн дуу байсан гэж үздэг. Төрийн дууллын аяыг Билэгийн Дамдинсүрэн, Лувсанжамбын Мөрдорж нар, үгийг Цэндийн Дамдинсүрэн зохиосон ба үг 2006 онд гурав дахь удаагаа өөрчлөгджээ.
"Эртний сайхан" дууг хуучцуул "Чингисийн төрийн сүлд дуулал" хэмээн ихэд хүндэтгэж байв. 1930-аад оны үеэс дуулахаа больж мартагдаж байсныг 1936-онд алдарт дуучин Магсар хурцын Дугаржав уртын дууны түүвэр ном бичихдээ оруулснаар дууны үг нь хадгалагдан үлдсэн байдаг. Мөн МУГЖ, Ж.Дорждагва 1970-аад онд Уртын дууны түүвэр бичихдээ "Эртний сайхан" дууны үгийг тухайн үеийн үзэл суртлын байдалд зохицуулан өөрчилжээ. Харин Олноо өргөгдсөн Монгол улсын үед "Зуун лангийн жороо луус" дуу төрийн сүлд дуулал болж байв.
Ардын хувьсгалын 30 жилийн ойг угтан 1950 онд хөгжмийн зохиолчдын дунд уралдаан зарлаж Л.Мөрдоржийн ирүүлсэн бүтээлийн эхлэл, Б.Дамдинсүрэнгийн ирүүлсэн бүтээлийн төгсгөлийг нийлүүлэн засч ая бүтсэн байна. Ц.Дамдинсүрэн зохиолч аяд тохирсон үг бичих даалгавар гүйцэтгэж, БНМАУ-ын Бага Хурлын Тэргүүлэгчдийн 43-р зарлигаар баталснаар 1950 оны дөрөвдугаар сарын 26-ны өдөр Монгол улс анх удаа албан ёсны төрийн дуулалтай болсон юм.
Б.Лхам